Türkiyə İsrailə neft tədarük edir? - Rəsmi açıqlama

Türkiyənin Energetika və Təbii Sərvətlər Nazirliyi Bakı-Tbilisi-Ceyhan (BTC) boru kəmərindən hasil edilən neftin satışı prosesi ilə bağlı açıqlama yayıb.

Teleqraf.com xəbər verir ki, açıqlamaya görə, Türkiyənin Ceyhan limanından İsrailə neft nəqli ilə bağlı iddiaların heç bir əsası yoxdur.

“BTC Türkiyə, Azərbaycan və Gürcüstan arasında 1999-cu il noyabrın 18-də imzalanmış beynəlxalq müqaviləyə uyğun fəaliyyət göstərir. Magistral yolun Türkiyə hissəsinin istismarı BTC üzrə tərəfdaşlarla imzalanmış Əməliyyat Sazişi çərçivəsində BOTAŞ International AŞ tərəfindən həyata keçirilir. BOTAŞ International AŞ neftin alınması və satışında iştirak etmir və ya idarə etmir. Türkiyənin icazəsi ilə Ceyhandan İsrailə neft göndərilməsi ilə bağlı iddialar tamamilə əsassızdır”, - deyə idarədən bildirilib.

Bəyanata görə, BTC kəməri ilə neft nəql edən və onu Heydər Əliyev limanından dünya bazarlarına çıxaran şirkətlər Türkiyənin İsraillə ticarəti dayandırmaq qərarına hörmətlə yanaşır və bu ölkəyə tədarük edilməyib.

Qeyd edək ki, "SOCAR Türkiyə" bir müddət öncə açıqlama yayaraq bəyan edib ki, hazırda SOCAR tərəfindən İsrailə xam neftin satışının həyata keçirilməsi ilə bağlı ittihamlar həqiqəti əks etdirmir və qəsdən ictimai rəyi çaşdırmaq məqsədi daşıyır.

"Dünyada neft satışı bazarının özünəməxsus xüsusiyyətləri var və hasil edilən xam neftin ticarət və ya treydinq şirkətləri vasitəsilə satışı həyata keçirilir. Tədarükçü şirkətlər xam neftin hansı ölkələrə daşınmasına, hansı məqsədlər üçün istifadə edilməsinə nəzarət və müdaxilə imkanlarına malik deyillər. Bu xüsusda, SOCAR digər neft şirkətləri kimi tədarük etdiyi məhsulları aidiyyəti treydinq şirkətləri ilə satış əlaqələri çərçivəsində həyata keçirir. Bununla birlikdə, bazarda fəaliyyət göstərən ticarət şirkətləri ilə davam edən mümkün satış əlaqələrimiz çərçivəsində, ticarət şirkətlərinin SOCAR-dan tədarük etdiyi xam neftin hansı ölkələrə daşındığına və hansı məqsədlə istifadə edildiyinə tərəfimizdən nəzarət və müdaxilə edilməsi mümkün deyil", deyə məlumatda bildirilib.