Terrorda şübhəli bilinən şəxs: "Əmrləri yerinə yetirmişəm"

Abror Azimov: "Mən terror aktında iştirak etdiyimi dərk etmədim"

14 nəfərin ölümü ilə nəticələnmiş Sankt-Peterburq metrosuna hücumda şübhəli bilinən şəxs iddiaları rədd edib.

Teleqraf.com BBC-yə istinadən xəbər verir ki, Qırğızıstan əsilli Abror Azimov sadəcə əmrləri "yerinə yetirdiyini" və nə etdiyini "dərk etmədiyini" deyib. Bundan əvvəl vəkili onun partlayışların arxasında olduğunu "tamamilə qəbul etdiyini" bildirmişdi.

Aprelin 3-ü baş vermiş hücumla bağlı 9 nəfər saxlanılıb. Akbarjon Cəlilov daşıdığı bombanı iki metro stansiyası arasında hərəkət edən qatarın içində partladıb.

Hücum zamanı 50-dən çox insan xəsarət alıb. Bundan əvvəl Rusiyanın təhlükəsizlik xidməti Abror Azimovun Qırğızıstanda doğulmuş rusiyalı Akbarjon Cəlilovu təlimdən keçirdiyini iddia edib.

Lakin çərşənbə axşamı günü Moskvada keçirilən məhkəmə çıxışında, o, hücumda "bilavasitə" iştirak etmədiyini deyib.

O, hücumun təşkilatçılığına məsuliyyət daşıdığını heç zaman etiraf etmədiyini əlavə edib. "Mən terror aktında iştirak etdiyimi dərk etmədim", o, bildirib. "Mənə əmrlər verildi və mən onları yerinə yetirirdim".

Abror Azimov məhkəməyə evli və bir uşaq atası olduğunu bildirib, Vesti telekanalı deyib. İstintaq işləri davam edir və onun barədə iyunun 3-nə qədər həbs qətimkan tədbiri seçilib. Polis Azimovu Akbarjon Cəlilovun telefon kontaktlarını nəzərdən keçirəndə tapıb.

Azimov bazar ertəsi günü iki yeni mobil telefon və sim kart alıb. Lakin kartların birini aktivləşdirəndə yerini təhlükəsizlik xidmətlərinə məlum edib.

Rusiya mediası Azimovun 1990-cu ildə Qırğızıstanda doğulduğunu və 2008-ci ildə Rusiyaya köçdüyünü deyir. Onun 2013-cü ildə Rusiya vətəndaşlığını aldığı deyilir.

Hücumla bağlı saxlanılan digər 8 şəxsin hamısı Mərkəzi Asiyadandır.