“Quql” mikroskopu xərçəng diaqnozunu asanlaşdıracaq - Video

"Quql" şirkətinin mühəndisləri toxuma nümunələrində xərçəng hüceyrələrinin aşkarlanması üçün süni intellektdən istifadə edən əlavə reallığa malik mikroskop prototipi təqdim ediblər.

Teleqraf.com "ICTnyus"-a istinadən xəbər verir ki, şirkət mütəxəssisləri tərəfindən adi optik mikroskop modifikasiya edilib. Okulyarda baxılan nahiyə kamera ilə qeydə alınaraq neyron şəbəkələrə göndərilir. Neyron şəbəkələr tərəfindən patoloji hüceyrələr aşkarlanır və həmin nahiyə şəffaf displey vasitəsilə göstərilir. Əlavə təsvirdə bu yerlər dərhal görünür ki, bu da mütəxəssisin işini asanlaşdırır. Layihə müəlliflərinin sözlərinə görə, bu yanaşma dəqiqliyinə görə peşəkar patoloq tərəfindən ənənəvi diaqnozqoymadan geri qalmır.

Məlumata görə, eksperimentlər hələ ki prostat və süd vəzi xərçəngini aşkarlaya bilən sistemlər üzərində keçirilib. Sistemlər hazırda real vaxt rejimində saniyədə 10 kadr tezliyi ilə işləyirlər. Nümunənin yeri dəyişilən zaman şəkil dərhal skan edilir və nəticə ekranda göstərilir.

Gələcəkdə mikroskopun digər xərçəng tiplərini, vərəm və malyariya xəstəliklərini aşkarlaması planlaşdırılır.