6 Aprel 2020 16:24
8 936
12 Punto 14 Punto 16 Punto 18 Punto

“Ermənistanda fəaliyyət göstərən bir sıra telekanallarda 2016-cı il Aprel döyüşləri haqda proqramlar nümayiş etdirdilər. Sənədli filmlərdə iddia olunur ki, aprel döyüşlərində Azərbaycan ordusuna məğlubiyyətin əsas günahkarları Ermənistanın keçmiş rəhbərliyidir. Yəni həmin dövrdə Serj Sərkisyanın rəhbərliyində olan hökumət, o cümlədən Ermənistan silahlı qüvvələrinin keçmiş qərargah rəisi Yuri Xaçaturov”.

Teleqraf.com xəbər verir ki, bu barədə Ermənistanın “Lragir” nəşrində dərc olunan bir məqalədə bildirilib.

Nəşr qeyd edir ki, sənədli filmlər günahın vurduğu ziyanı aradan qaldırmasa da, bir neçə əsas suala da cavab vermədi:

“2016-cı il martın 31-də ABŞ-da Serj Sərkisyan və Co Bayden nədən danışdılar, ABŞ-dan yeni təkliflər var idi və Baydenlə görüşdən sonra bölgədə niyə döyüşlər başladı?

Döyüşlər hansı şərtlər daxilində dayandırıldı?

Niyə Ermənistan bölgədə beynəlxalq insidentlərin araşdırılması mexanizmlərini yerləşdirməkdə israr etmədi və Rusiya belə mexanizmlərin yaradılmasına mane oldu? Rusiya bunun müqabilində KTMT qoşunlarının və ya rus sülhməramlılarının yerləşdirilməsini təklif etdimi?

Bunlar son dərəcə vacib suallardır və onlara açıq cavablar indi Ermənistanın özünə qarşı yeni təzyiq dalğasını aradan qaldırmasına kömək edə bilər. Bütün bunlar Rusiya bölgədəki mövqeyini Azərbaycanın xeyrinə gücləndirir. Bu baxımdan maraqlıdır ki, Ermənistan yaranmış vəziyyətə görə KTMT-yə kömək üçün müraciət etmir”.

“Lragir”in analitikləri hesab edir ki, əslində 2016-cı ilin aprel ayında baş verən dördgünlük savaş ABŞ və Rusiyanın nüfuz savaşının nəticəsi idi: “Bu, bölgənin birinin digərinə güzəştə getməyəcəyinin nəticəsi idi. Tarix Ermənistanı bu dilemma qarşısında mühakimə edəcək”.

Erməni analitiklər aprel döyüşlərindən sonra yaranmış vəziyyətin Ermənistanın zərərinə olduğunu, bölgədə maraqları olan hər iki supergücün – Rusiya və ABŞ-ın bundan sonra Azərbaycanın xeyrinə dəyişən mövqelərinin İrəvanı çətin vəziyyətdə qoyduğunu da iddia edirlər.

Analitiklər onu da qeyd edirlər ki, Rusiyanın öz sülhməramlılarını bölgədə yerləşdirmək cəhdləri baş tutsa belə, Ermənistan bunu öz xeyrinə olacağından rahat olmamalıdır.

“Lragir” ABŞ-ın Ermənistandakı səfiri Linn Treyzinin Vaşinqtonun Qarabağın minalardan təmizlənməsi fəaliyyətini dayandırmaq qərarına verdiyi cavaba diqqət çəkir:

“Fikrimcə, ABŞ-ın münaqişənin həllinə, uzunmüddətli dincliyin təmin olunmasına kömək edə biləcək variantları nəzərdən keçirir. ABŞ münaqişənin ədalətli həllində maraqlıdır”.

Erməni mütəxəssislər isə hesab edir ki, ABŞ-ın nəzərdən keçirdiyi variantlar Ermənistanın xeyrinə olmaya bilər. Ekspertlər bu baxımdan ABŞ-dan Qarabağdakı separatçı rejimə maliyyə yardımının dayandırılmasının təsadüfi olmadığını vurğulayırlar.


Müəllif: Mənsur Rəğbətoğlu