"Trampı Putinlə otaqda tək qoymağa qorxdum” - Con Bolton

ABŞ Prezidentinin milli təhlükəsizlik məsələləri üzrə sabiq müşaviri Con Bolton 2018-ci ilin iyul ayında Helsinkidə keçirilən görüşdə Amerika lideri Donald Trampın Rusiya Prezidenti Vladimir Putinlə təkbətək qalmasından narahat olduğunu bəyan edib.

Teleqraf.com xəbər verir ki, Con Bolton bunu “ABC News” telekanalına müsahibəsində bildirib.

Narahatlığın səbəbinə dair sualı cavablandıran Con Bolton deyib: “Mən onun nə danışacağını bilmirdim”.

Con Bolton Vladimir Putini həmsöhbətini tanıyan ağıllı və güclü bir lider kimi xarakterizə edib.

Bundan əvvəl Donald Tramp Con Boltonun “külli miqdarda gizli informasiya” ehtiva edən memuar nəşr etdirməklə “qanunu pozduğunu” bəyan edib.

Kolumbiya paytaxt dairəsi federal məhkəməsi ABŞ Ədliyyə Nazirliyinin Con Boltonun xatirələrinin dərc edilməsinin qadağan olunması ilə bağlı iddisını rədd edib. Məhkəmə qeyd edib ki, bu, “düzəlməz zərərin” qarşısını almayacaq.