31 Avqust 2020 12:30
10 055

“Azərbaycan prezidentinin köməkçisi Hikmət Hacıyevin “Ermənistana guya tikinti materiallarının daşındığı barədə Rusiyanın izahı bizi qane etmir” bəyanatı ölkə ictimaiyyəti və ekspertləri tərəfindən alqışlarla qarşılanır”.

Teleqraf.com xəbər verir ki, bunu politoloq Zaur Məmmədov deyib.

Ekspert regionda ciddi hadisələrin baş verdiyini söyləyib:

“Şoyqunun Bakıya gələrək Zakir Həsənovla görüşdə Rusiyanın Azərbaycanla yeni hərbi-texniki sazişin ( silah alveri) tez bir zamanda imzalanmasının vacibliyini dilə gətirməsi, qarşılığında isə Ermənistana pulsuz silahlar ötürməsi siyasi şıltaqlığın bariz nümunəsidir. Hətta bu yaxınlarda Serj Sərkisyan da 2010-2018-ci illər ərzində Ermənistana Rusiya tərəfindən pulsuz hərbi texnikalarının verilməsini etiraf etmişdi.

Azərbaycan Rusiya ilə münasibətlərə həmişə böyük önəm verib, Moskvanın maraqlarına tapdalayacaq heç bir siyasətdə yer almayıb. Bakı bundan sonra da Rusiyanın regiondakı tərəfdaşı olmaqda davam etmək istəyir. Torpaqların qaytarılması müqabilində biz Kremlin başçılığı altında müxtəlif təşkilatlara da daxil olmağa hazır idik. Azərbaycan kimi geoiqtisadi və logistik cəhətdən vacib ölkənin Rusiya ilə müxtəlif sahələrdə daha sıx inteqrasiyası Moskva üçün indiki zamanda böyük əhəmiyyətə malikdir.

Lakin Cənubi Qafqazla bağlı kuratorluq Lavrov və Şoyquya həvalə olunub. Onlar isə xarici siyasətdə realizm yanaşması mövqeyindən çıxış edərək qarşı tərəflərdən maksimum fayda almaq, minimum kompromisə getmək formulu ilə çıxış edirlər”.

Zaur Məmmədovun sözlərinə görə, regionda son vaxtlar baş verənlər onu göstərir ki, bir çox vacib dövlətlərlə diplomatik təmasların intensivləşməsinə ehtiyac var: “Rusiya ilə də danışıqlar davam etməlidir. Bu olduqca vacib və təcilidir”.


Müəllif: Mənsur Rəğbətoğlu