Rusiya, Azərbaycan və Türkiyəyə qarşı qorxunc plan – Hərəkət əmri verildi

PKK/YPG-nin bir qolu kimi fəaliyyət göstərən və özlərini "erməni taboru" adlandıran terrorçular Qarabağdakı məğlubiyyətdən sonra Suriyaya geri qayıdıblar. Məğlubiyyəti həzm edə bilməyən terrorçuların Türkiyə, Rusiya və Azərbaycanda mülki insanlara qarşı terror aktları hazırladığı iddia edilib. Qruplaşma Bəşər Əsəd rejiminin nəzarətində olan bölgələrdə sərbəst hərəkət edir.

Teleqraf.com xəbər verir ki, bu barədə Türkiyədə nəşr olunan “Yeni Şafak” qəzeti yazıb.

Mənbə qeyd edir ki, 2019-cu ildə PKK/PYD/YPG terror təşkilatının erməni muzdlularından formalaşdırılan taboru məğlubiyyətin əsas səbəbi kimi gördükləri Rusiya, Türkiyə və Azərbaycanda dinc insanlara qarşı “canlı bomba” hücumları həyata keçirməyi planlaşdırdığı bildirilib:

“Təhlükəsizlik mənbələrindən verilən məlumata görə, taborun üzvləri arasında Ermənistan ordusundan olan generallar da var.

Suriya Demokratik Qüvvələri (SDQ) daxilində fəaliyyət göstərən qondarma erməni taboru Qarabağda atəşkəs elan edildikdən sonra Suriyaya qayıdıb. Bölgədəki mənbələr Suriya rejimi ilə yaxın əlaqələri olan taborun rejimin nəzarətindəki bölgələrdə rahat hərəkət etdiyi və fəaliyyət planlarını orada həyata keçirdiyi barədə məlumat verib. Əldə edilən məlumata görə, Ermənistanın Dağlıq Qarabağdakı ağır məğlubiyyətindən sonra PKK ilə əlaqədə olan erməni qrupları səs-küylü fəaliyyət planlarına keçiblər.

Regional qaynaqlar erməni taborunun Türkiyə, Azərbaycan və Rusiyanı məğlubiyyətindən məsul gördüyünü, mülki hədəflərə istiqamətli “canlı bomba” hücumları həyata keçirməyi planlaşdırdıqları barədə məlumat əldə etdiyini bildiriblər”.

Nəşr xatırladır ki, ötən il Təl-Temirdə qurulan 30-40 nəfərlik terror qrupu İŞİD tərəfindən öldürülən erməni terrorçu Nübar Ozanyanın adını daşıyır:

“Müxtəlif ölkələrdə yaşayan ermənilərdən və Ermənistan vətəndaşlarından ibarət “Nübar Ozanyan” SDQ daxilində fəaliyyət göstərir. Rəhbərləri arasında hələ də Ermənistan ordusunda çalışan erməni hərbçiləri var. Bu günə qədər əsasən Suriyada fəaliyyət göstərən qruplaşma PKK/PYD-YPG liderləri tərəfindən Azərbaycan və Ermənistan arasındakı münaqişədə iştirak etmək üçün Qarabağa göndərilmişdi”.