“Bu, siyasi maraqlardan qidalanan böhtandır” – Fəxrəddin Altun

1915-ci il hadisələrinin tarixi keçmişi, hüquqi miqyası və günümüzə əks olunma hallarını müzakirə etmək məqsədilə Türkiyə Prezident Administrasiyasının Kommunikasiya İdarəsi tərəfindən 1915-ci il hadisələri ilə bağlı beynəlxalq konfrans təşkil edilib.

Teleqraf.com xəbər verir ki, Türkiyə Prezident Administrasiyasının Kommunikasiya İdarəsinin rəhbəri Fəxrəddin Altun konfransda çıxış edərək proqramda irəli sürüləcək fikirlərin həqiqətlərin üzə çıxmasına töhfə verəcəyini, çünki təvazökar, lakin bir o qədər də cəsur insanların həqiqətə olan inamı sayəsində tarixin düzgün oxuna bildiyini söyləyib.

F. Altun Osmanlı dövlətinin imperiyanın son dövründə çox böyük çətinliklərlə mübarizə apardığını qeyd edib.

“Çanaqqala, Qafqaz, Hicaz, Fələstin və İraqda böyük mübarizə apardıq. Türkiyə Cümhuriyyəti olaraq 1915-ci ildə Osmanlı imperiyası tərəfindən qəbul edilmiş “Təhcir Qanunu”nun tətbiqi zamanı yaşanan ağrılı hadisələri bütün qəlbimizlə hiss edirik. Prezidentimiz cənab Rəcəb Tayyib Ərdoğanın da dediyi kimi, birlikdə Türkiyə olmanın kədərdə və sevincdə birgə olmaqdan keçdiyinə inanırıq. Bununla yanaşı bu gün əsrlər boyu sülh şəraitində birlikdə yaşamış türk və erməni xalqlarının ortaq keçmişini təhrif edərək tarixdən düşmənçilik yaratmağa cəhd edən bir hekayə ilə qarşı qarşıyayıq. Və biz bu hekayəyə qarşı çıxırıq”.

Fəxrəddin Altun daha sonra deyib:

“Həqiqətə çatmaq istəyimiz siyasi qazanc üçün deyil, sırf həqiqətin özü üçündür. Hörmətli prezidentimizin 1915-ci il hadisələri ilə bağlı arxivlərin açılması və elmi yanaşma çağırışı da bunun üçündür. Bu, həqiqət çağırışıdır. Qondarma erməni soyqırımı böhtanı həqiqətlə heç bir əlaqəsi olmayan, sadəcə, siyasi maraqlardan qidalanan bir iddiadır. Hansı parlamentin nə qərar verdiyinin, hansı xarici dövlət başçısının bu hadisələr haqda hansı ifadəni işlətməsinin bizim nəzərimizdə heç bir qiyməti yoxdur. Bizim üçün əsas olan keçmişdən bu günə qədər bu torpaqların övladlarının qəlbində ədalətli bir yer tuta bilməkdir. Bu konfransın 1915-ci il hadisələrinin yaşandığı tarixi keçmişi unutdurmamaq və ölkəmizi qondarma erməni soyqırımı böhtanı ilə diz çökdürmək cəhdlərinin qarşısını almaq üçün vacib funksiyanı yerinə yetirəcəyinə inanırıq”.