2 Dekabr 2023 11:41
12 666
12 Punto 14 Punto 16 Punto 18 Punto

BMT Təhlükəsizlik Şurasında Somaliyə silah embarqosunun ləğvi ilə bağlı qətnamə layihəsi səsə qoyulub.

Teleqraf.com xəbər verir ki, qanun layihəsi yekdilliklə qəbul edilib.

Qərarın əsas məqsədi “Əş-Şəbab” Hərəkatından gələn təhlükəni azaltmaqdır.

Qərarda “Əş-Şəbab”ın Somali və bölgənin təhlükəsizliyinə davam edən təhdidinin narahatlıqla qarşılandığı bildirilib.

Somalinin BMT-dəki daimi nümayəndəsi Əbukar Dahir Osman səsvermədən sonra qərarın ölkəsinin təhlükəsizlik təhdidləri ilə mübarizəsinə töhfə verəcəyini deyib.

BMT Təhlükəsizlik Şurası ordunun silah-sursat və bomba hazırlamasında istifadə olunan materiallarının “Əş-Şəbab”ın əlinə keçməsinin qarşısını almaq məqsədilə 1992-ci ildən Somaliyə silah embarqosu tətbiq edirdi.

“Əş-Şəbab” Somalidə hökuməti devirmək üçün mübarizə aparan silahlı təşkilatdır. 2011-ci ildən etibarən ölkənin cənubunun çox hissəsinə nəzarət edir. Həmin bölgələrdə sərt şəriət qanunları tətbiq olunur. Məlumata görə, “Əş-Şəbab”ın təxminən 15 minlik canlı qüvvəsi var. Təşkilatın hazırkı lideri Əhməd Ömərdir.


Müəllif: Mənsur Rəğbətoğlu