Qəzza zolağı necə idarə olunacaq? - Ağ Evdən qərar

Fələstin Milli İdarəsinin (PNA) indi Qəzza zolağının idarə olunmasında mühüm rolu var.

Teleqraf.com xəbər verir ki, bu sözləri ABŞ prezidentinin milli təhlükəsizlik üzrə müşavirinin birinci müavini Con Fayner Aspen Forumunda deyib.

Çıxışı zamanı o, hazırda buna alternativin olmadığını deyib.

"Biz inanırıq ki, hazırda Fələstin Muxtariyyəti təkcə İordan çayının qərb sahilində deyil, həm də Qəzzada mühüm rol oynamalı olacaq", - amerikalı rəsmi bildirib.

Qeyd edək ki, dekabrın 5-də “Politico” Qəzza zolağının gələcəyi ilə bağlı ABŞ və İsrail hökumətləri arasında fikir ayrılıqlarını vurğulayan məqalə dərc edib. Nəşrin məlumatına görə, Vaşinqton hərbi əməliyyatlar başa çatdıqdan sonra Fələstin anklavının prezident Mahmud Abbasın başçılıq etdiyi Fələstin Milli İdarəsinin nəzarətinə verilməsini zəruri hesab edir.

Öz növbəsində İsrail dövlətinin baş naziri Benyamin Netanyahu bu təşəbbüsün həyata keçirilməsinə qarşı çıxıb. Buna baxmayaraq, nəşrin müəlliflərinin qeyd etdiyi kimi, amerikalı strateqlər bu ssenarini ən real hesab edirlər.