Mirzoyandan Bakıya “dostluq” mesajı - “Təkcə sülh sazişi imzalamayaq, həm də..”

Ermənistan Azərbaycanla sülh müqaviləsinin imzalanmasını istəyir.

Teleqraf.com xəbər verir ki, bunu Ermənistan xarici işlər naziri Ararat Mirzoyan Almatıda azərbaycanlı həmkarı Ceyhun Bayramovla görüşündə deyib.

“Mən bu görüşün təşəbbüskarı və təşkilinə görə Qazaxıstan tərəfinə təşəkkür edirəm. Ermənistanda Qazaxıstanın iki dost ölkəni razılığa gəlmək və Cənubi Qafqazda davamlı sülhün bərqərar olması üçün dəstəkləmək istəyini yüksək qiymətləndiririk. Görüşün burada təşkilinin simvolik mənası var, biz bu gün Almatıda – 1991-ci il bəyannaməsinin imzalandığı bu gözəl şəhərdə, həmin “Dostluq Evi”ndə görüşürük. Nəzərinizə çatdırım ki, bu, SSRİ dövründəki inzibati sərhədləri dövlətlərarası sərhəd kimi tanıyan keçmiş sovet respublikaları tərəfindən imzalanmış sənəddir.

Son iki il ərzində həm Ermənistan baş naziri, həm də Azərbaycan prezidenti müxtəlif formatlarda Almatı bəyannaməsinə sadiqliklərini təsdiqləyiblər”, - nazir bildirib.

Mirzoyan qeyd edib ki, Bakı və İrəvan Almatı bəyannaməsi çərçivəsində qarşılıqlı ərazi bütövlüyünün tanınması və sərhədlərin müəyyənləşdirilməsini təsdiqləyib:

“Bir daha vurğulamaq istərdim ki, Ermənistan sülhə, beynəlxalq müqaviləyə can atır. Biz sülh prosesində konstruktiv iştirak edirik, üstəlik hesab edirik ki, sülh sazişinin imzalanması ilə məhdudlaşmamalıyıq. Bölgədəki nəqliyyat kanallarını açmaq üçün irəli gedə bilərik. Bütün kanalların ölkələrin suverenliyi altında olacağı, ərazisindən keçəcəkləri ölkələrin yurisdiksiyasında fəaliyyət göstərəcəkləri və dövlət sərhədini keçmək üçün bütün prosedurların razılaşdırılacağı anlayışı ilə (inzibati, gömrük) qarşılıqlılıq prinsipinə uyğun olaraq...”.