Yaşar Bəşirov: “Dünyaya göstərəcəyik ki, islam...”

Azərbaycana ilk qızıl medalları məhz karateçilərimiz qazandıracaq.

IV İslam Həmrəyliyi Oyunlarında Azərbaycana ilk qızıl medalları məhz karateçilərimiz qazandıracaq. Karateçilərimizdən ən azı 2 qızıl medal gözləyirik.

Milli Karate Federasiyasının prezidenti Yaşar Bəşirov Teleqraf.com-a Bakı 2017-də karateçilərdən şanslarını dəyərləndirərkən deyib.

O bildirib ki, karateçilərdən daha çox medal qazanacağını gözləyir: "İlk Avropa Oyunlarında 1 qızıl, 2 gümüş medal qazanacağımızı proqnozlaşdırmışdıq, ancaq 4 qızıl, 2 bürünc medal aldıq. 50 dövlət arasında birinci yerə çıxdıq. Bakı 2017-də 54 dövlətin atletləri mübarizə aparacaq. İran, Türkiyə, Misirin karate komandaları güclüdür. Buna baxmayaraq çalışacağıq ki, həmişəki kimi birinci olaq. Hesab edirəm ki, ümumi hesabda 5-6 medal qazanacağıq".

Qadın atletlərinə də ümidlərinin böyük olduğunu söyləyib: "İrina Zaretskaya Avropa Oyunlarında qızıl almışdı, indi dünyanın bir nömrəli idmançılarındandır. İlahə Qasımova isə 3-cü yerə çıxmışdı, bu dəfə o da qızıl medal qazana bilər".

Yaşar Bəşirov qeyd edib ki, karate üzrə milli komandamızın üzvləri IV İslam Həmrəyliyi Oyunlarını həvəslə gözləyirlər: "Hazırlıqlarımızı qənaətbəxş saymaq olar. Ümid edirəm ki, komandamız Bakı 2017-də etimadı doğruldacaq. Bütün dünyaya göstərəcəyik ki, İslam terror yox, böyük mədəniyyətdir. Bizim qədim ənənələrimiz var. Bu din sülh gətirir. İslam dövlətlərinin nəyə qadir olduğunu göstərəcəyik. Avropa Oyunlarını hansı səviyyədə keçirdiyini göstərdik. Şəhərimizin gözəlliyi göz qabağındadır. Hamı heyran qalır. Biz artıq idman dövlətiyik. Artıq insanlar təkcə karateçilərimizi deyil, digər idman növlərində yarışan atletlərimizi də tanıyır".

Qeyd edək ki, Bakı 2017 çərçivəsində mayın 12-dən 14-dək karate yarışları baş tutacaq.

Nərgiz