“Hamımız türk malı alaq” – Millət vəkilindən təklif

“Son illər bir sıra aparıcı dövlətlərin qardaş ölkəyə olan siyasi basqıları Türkiyə iqtisadiyyatına da təsirsiz ötüşməyib”.

Teleqraf.com xəbər verir ki, bunu millət vəkili Vüqar Bayramov deyib.

Millət vəkili qardaş ölkənin Dağlıq Qarabağ məsələsində Azərbaycana ciddi siyasi dəstəyinin olduğunu bildirib:

“Azərbaycanın 13 milyard 667 milyon dollarlıq illik idxalında 4 ölkə 1 milyard dollardan artıq paya malikdir. Ötən il Rusiyadan 2 milyard 290 milyon dollar, Türkiyədən 1 milyard 646 milyon dollar, Çindən 1 milyard 432 milyon dollar və İsveçrədən 1 milyard 223 milyon dollarlıq mal almışıq.

Qalan 7 milyard dollarlıq idxalımız isə digər ölkələrin payına düşür. İdxal həmin ölkəyə valyuta dəstəyi deməkdir. Yəni biz hansı ölkədən idxal ediriksə həmin ölkəyə valyuta göndəririk.

Qarabağımız uğrunda apardığımız savaşda Türkiyənin Azərbaycana ciddi siyasi dəstəyi var. Son illər bir sıra aparıcı dövlətlərin qardaş ölkəyə olan siyasi basqıları Türkiyə iqtisadiyyatına da təsirsiz ötüşməyib. Biz bazarlıq edən zaman yerli məhsullarla yanaşı Türkiyə malları almaqla qardaş ölkə iqtisadiyyatına töhvə vermiş olarıq. Hamımız türk malı alsaq, xeyir qardaşımıza qalar”.