İctimai Birlik şimal bölgəsində maarifçilik aksiyaları təşkil edir

Media və Mülki Cəmiyyət İctimai Birliyi “Şimal bölgəsində gənclərin dini radikalizm təzahürləri ilə mübarizə yönümündə maarifçilik aksiyalarının təşkili” mövzusunda layihə həyata keçirir.

Prezident yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə baş tutan layihənin hazırlıq işləri artıq yekunlaşmaq üzrədir.

Bu barədə Teleqraf.com-a layihənin rəhbəri, Media və Mülki Cəmiyyət İctimai Birliyinin sədri Xanoğlan Əhmədov məlumat verib.

X.Əhmədov bildirib ki, layihə çərçivəsində şimal bölgəsində yerləşən rayonlarda (Xaçmaz, Quba, Qusar) gənclər arasında dini radikal ekstremizmə qarşı mübarizə yönündə maarifçilik aksiyaları təşkil ediləcək, maarifləndirmə və məlumatlandırma tədbirləri həyata keçiriləcək.

“Xaçmaz şəhərində “Dini radikalizmə qarşı mübarizədə gənclərin rolu”, Quba şəhərində “Azərbaycan – tolerantlıq diyarı” və Qusar şəhərində “Dini radikalizmin doğurduğu təhlükələr” mövzusunda gənclərin, yerli ilahiyyatçıların, tanınmış pedaqoqların, müxtəlif dini konfessiya və müvafiq dövlət qurumları təmsilçilərinin iştirakı ilə dəyirmi masaların keçirilməsi nəzərdə tutulub. Həmin tədbirdə mövcud problemlər və çıxış yolları müzakirə olunacaq”, – deyə X.Əhmədov əlavə edib.

Səxavət