Futbol yarışları üçün biletlər qurtardı - İslamiada

Bakı 2017 İslam Həmrəyliyi Oyunlarında Azərbaycan komandasının futbol yarışlarındakı bütün qrup mübarizələrinə olan biletləri satılıb qurtarıb.

Teleqraf.com xəbər verir ki, beynəlxalq futbol yarışlarını izləmək istəyən azarkeşlər üçün, yarışın qrup mərhələsinin digər oyunlarına, Türkiyə, Kamerun, Əlcəzair və Səudiyyə Ərəbistanı görüşlərinə, habelə yarım final, bürünc medal və final matçlarına müəyyən sayda bilet qalıb.

Mayın 8-dən start götürəcək futbol idman növünün qrup mərhələsinin yarışları Dalğa Arena, Azal Arena və Bayıl Arenada keçirilir. Bakı 2017 İslam Həmrəyliyi Oyunlarına biletlər Baku-2017 veb-saytı – www.baku2017.com vasitəsilə onlayn rejimdə və ya Bakıda yerləşən 12 satış məntəqəsində, o cümlədən 28 Mall, Gənclik Mall və Park Bulvar ticarət mərkəzlərində satışdadır.

Əməliyyat Komitəsindən verilən məlumata görə, ev sahibi olaraq, Azərbaycan komandasını dəstəkləmək və ona azarkeşlik etmək istəyindən irəli gələrək, məhz yerli idmançılarımızın qatıldıqları bütün idman yarışlarına bilet satışı yüksəkdir.

Bakı 2017-nin Bilet Satışı üzrə direktoru Miryam Boqatay deyib: “Azərbaycan xalqının IV İslam Həmrəyliyi Oyunlarında öz doğma idmançılarına azarkeşlik etmək üçün bu cür böyük istək nümayiş etdirdiklərini görmək çox xoşdur. Biletlərin satışı zamanı diqqət cəlb edən məqamlardan biri, idman sessiyaları zamanı uşaqlar üçün ayrılmış biletlərə tələbatın yüksək olmasıdır ki, bu da ailələrin IV İslam Həmrəyliyi oyunlarına böyük maraq göstərməsi deməkdir”.

Açılış və bağlanış mərasimlərinə gəlincə, direktor qeyd edib ki, açılış mərasimi üçün D kateqoriyası biletlərinin artıq satılıb qurtarması insanların 12 may tarixində Bakı Olimpiya Stadionunda keçiriləcək bu mərasimə böyük maraq göstərdiklərini bir daha sübut edir: “Çox məhdud sayda A, B və C kateqoriyalı biletlər hələ də satışdadır. Təcrübə göstərir ki, açılış və bağlanış mərasimlərinə bilet satışına tələbat həmişə yüksək olub. Biz bu möhtəşəm tədbirlərin hər hansı birini izləmək istəyən hər kəsi tədbiri qaçırmamaq üçün biletlərini ən qısa zamanda əldə etməyə çağırırıq”.

Qeyd edək ki, Bakı 2017 İslam Həmrəyliyi Oyunlarında İHİF-in dörd qitədə yerləşən 57 üzv ölkəsinin hər birindən olan idmançılar iştirak edəcək. İdmançılar futbol, atletika, gimnastika, güləş və boks daxil olmaqla 20 idman növü üzrə 270 medal dəsti uğrunda mübarizədə yarışacaq.

Nərgiz