Bölgələrdə milli-mənəvi dəyərlər təbliğ edilir

Dini Qurumlarla İş üzrə Dövlət Komitəsinin dəstəyi ilə Masallı rayonunun Hişkədərə kənd məscidi dini icmasında “Milli-mənəvi dəyərlərimizi qoruyaq!” layihəsi çərçivəsində tədbir keçirilib.

Komitənin mətbuat xidmətindən Teleqraf.com-a verilən məlumata görə, tədbirdə komitənin Masallı bölgəsi üzrə şöbə müdiri Miryəhya Bədirov, ilahiyyatçı Saleh Kazımov, QMİ-nin bölgə qazısı Mirqiyas Təhməzov, Masallı RİH-nin Hişkədərə kənd ərazisi üzrə nümayəndəsi Qumriyyə Cəfərova, dini icmanın üzvləri, kənd ağsaqqalları, dindarlar, ziyalılar və gənclər iştirak ediblər.

Masallı rayonunun Hişkədərə kənd məscidi dini icmasının sədri Söhrab Ağayev layihə çərçivəsində görülən tədbirlər barədə məlumat verərək bildirib ki, bu tədbirlər böyük əks- səda doğurub, əhali tərəfindən müsbət qarşılanıb. Keçən müddət ərzində sağlam dini biliklərə söykənən maarifləndirmənin aparılması ilə yanaşı, cəmiyyətdə mövcud olan sosial problemlərin həlli istiqamətində də tədbirlər həyata keçirilib. İcma sədri bildirib ki, keçən müddət ərzində müxtəlif mövzularda tədbirlər həyata keçirilib.

Tədbirdə ekspert kimi iştirak edən ilahiyyatçı S.Kazımov “Milli-mənəvi dəyərlərimiz: tarixdən bu günümüzə” mövzusunda məruzə ilə çıxış edib. Milli-mənəvi dəyərlər anlayışına aydınlıq gətirən ekspert milli kimliyimizin formalaşmasında bu dəyərlərin roluna toxunub. Azərbaycan cəmiyyətində milli-mənəvi dəyərlərin anlamını praktik misallarla əsaslandırmağa çalışıb.

QMİ-nin bölgə qazısı Mirqiyas Təhməzov öz həyat təcrübəsindən bəhs edərək son illər ərzində dövlət-din münasibətlərində müsbətə doğru atılan addımlardan danışıb. Dini maarifləndirmə və milli-mənəvi dəyərlərimizin qorunması üçün dövlət tərəfindən dini icmalara maliyyə yardımının ayrılmasını çox böyük rəğbətlə qarşıladıqlarını bildirib.

Qeyd edək ki, Masallı rayonunun Hacıtəpə kənd məscidi dini icmasında, Astara rayonu Şahağac kənd məscidi dini icmasında, Sığaloni kənd məscidi dini icmasında Şüvi kəndi "Cümə" məscidi dini icmasında, Pensər kəndi "Hacı Teymur" Cümə məscidi dini icmasında dini maarifləndirmə, mənəvi dəyərlərlə bağlı tədbrilər keçirilib.

BƏXTİYAR