Röyadan müraciət: “Biabırçılıqdır... Əldən gedirik…” - Video

Əməkdar artist Röya Ayxan bütün radioları sərt şəkildə qınayıb.

Teleqraf.com xəbər verir ki, müğənni radioların yerli mahnılar yerinə xarici mahnılara üstünlük verməsini biyabırçılıq adlandırıb:

"Doğrudan da biabırçılıqdır. Soruşun niyə? Maşında gedirəm və artıq 5-ci radioya çevirmişəm ki, türk mahnıları oxunur. Görəsən, biz bu qədər pul buraxırıq, bunların haqqını kim verəcək? Dörd gecədir Nihat Odabaşı ilə klip çəkirik. Sonra da yekə-yekə deyirik ki, türklər gəlir Bakıya bizimkiləri tanımır. Bizimkilər onların əlindən öpür. Düzdür, mən öpməmişəm. Amma öpənlərimiz çox olub. Radiolara səslənib deyirəm ki, ya işinizi bilin, ya da "işinizi bilin"! Çünki adam sizin üçün heç mahnı da oxuyub vermək istəmir. Ona görə də sonra deməyin ki, bizi heç kim görmür, saymır. Siz özünüz özünüzü saymırsınız. Sizə uğurlar olsun, qınından çıxıb qınını bəyənməyənlər!"

Əməkdar artist Milli Televiziya və Radio Şurasının direktoru Nuşirəvan Məhərrəmliyə müraciət edib:

"Burdan Nuşirəvan müəllimə müraciət edirəm, xahiş edirəm ki, televiziyalarda klip saatı ayrılsın. Bizə bu dərəcədə hörmətsizlik olmaz. Sizi başa düşürəm, Nuşirəvan müəllim. Başınız ən çox keyfiyyətli və maraqlı olsun deyə verilişlərə qarışıb. Amma biz "əldən gedirik", belə olmaz. Bütün sənət dostlarım mənimlə razı olacaqlar. Kim qorxaqdırsa, razı olmasın".