Fransada etiraz aksiyası: 13 polis əməkdaşı xəsarət aldı

Fransanın Nant şəhərində "Milli cəbhə" lideri Marin Le Pen əleyhinə seçkiqabağı keçirilən etiraz aksiyaları zamanı baş vermiş iğtişaşlarda hüquq-mühafizə orqanlarının azı 13 əməkdaşı xəsarət alıb.

"Report" "TASS"a istinadən xəbər verir ki, bu barədə yerli polis şöbəsinin "Twitter" şəbəkəsindəki mikrobloqundakı səhifəsində məlumat verilib.

"Nant şəhərində "Milli cəbhə"yə qarşı nümayişlərin yekunu: 13 polis və jandarm yaralanıb", - deyə məlumatda deyilir. Qeyd edək ki, ilkin məlumatda iğtişaşlarla əlaqadar 4 nəfərin saxlanıldığı bildirilirdi.

Üç mindən artıq insan iştirak etdiyi nümayişlərin əsas hissəsi dinc şəraitdə keçib. Lakin nümayişlərin sonuna yaxın bəzi iştirakçılar asayiş keşikçilərini əvvəlcə daşa basıblar, sonra isə asayiş keşikçilərinə yandırıcı mayelərlə dolu butılkalar atıblar.