AKİ tammetrajlı ssenari müsabiqəsi elan etdi - “Mən qadınam”

Azərbaycan Kinematoqrafçılar İttifaqı “Mən qadınam” adlı tammetrajlı bədii film ssenari müsabiqəsi elan edir.

Teleqraf.com xəbər verir ki, ssenarilər 15 dekabr tarixindən - 15 aprel 2025-ci ilə qədər Azərbaycan Kinematoqrafçılar İttifaqına təqdim edilməlidir.

Bildirilir ki, AKİ ssenari müsabiqələrini kinomuzu inkişaf etdirən, müəlliflər arasında rəqabəti artıran və ssenari yaradıcılığına marağı stimullaşdıran mühüm mexanizm sayır. Müstəqillik illərinin kinomuzun ən böyük boşluqlarından biri - qadın qəhrəmanlardır. Halbuki ölkəmizdə 30 il ərzində baş verən siyasi, iqtisadi, hərbi kataklizmlərin ağrılarını məhz Azərbaycan qadını öz çiyinlərində daşıyıb. Həmçinin müasir ssenarilərimizdə parlaq qadın obrazlarının yoxluğu kino aktrisalarımızın da peşəkar və texniki inkişafının qarşısını alır.

Müsabiqə qaliblərinin adı 2 avqust 2025-ci il tarixində elan olunacaq.

Qaliblər (I, II, III yerlər, pul mükafatı 5000 AZN, 3500 AZN, 2500 AZN) diplom və pul mükafatı ilə təltif ediləcəklər.