Rusiyaya dost zərbəsi - Hindistan da geri çəkilməyə başladı

Rusiyanın Ukraynanı işğalı cəhdi, müharibə və dağıntılar Kiyevi müxtəlif gəlirlərdən məhrum edib. Bunlardan biri də təhsil sahəsidir. Dünyanın müxtəlif ölkələrindən hər il on minlərlə gənc Ukraynada təhsil almağa gedirdi. Azərbaycan gənclərinin bir qismi də Türkiyə ilə yanaşı, Ukraynada təhsil almağa üstünlük verirdi. Kiyev və Xarkovdakı ali təhsil ocaqlarında müxtəlif millətlərin nümayəndələri təhsil alırdılar.

Teleqraf.com xəbər verir ki, bu barədə “Atlas” Araşdırmalar Mərkəzinin analitik məqaləsində bildirilib.

Məqalədə qeyd edilib ki, Ukraynada uzaq Çin və Hindistandan da oxumağa gedənlər az deyildi:

“Müharibə və Xarkov bombardman edilməyə başladıqda tələbələrin böyük qismi çətin vəziyyətə düşdü. Bir sıra ölkənin lideri Rusiya prezidentinə zəng edərək tələbələrini humanitar dəhliz vasitəsilə çıxarmaq üçün imkan yaradılmasını xahiş edirdilər. Hindistan Baş naziri Narendra Modi də bu mövzuda Rusiya və Ukrayna prezidentləri ilə telefonda danışaraq hindli tələbələri Xarkovdan çıxarmağa çalışırdı. Müharibəyə qədər Ukraynada 15 min hindli tələbə təhsil alırdı. Onlar müxtəlif humanitar dəhlizlər vasitəsilə canlarını qurtarmağa çalışırdılar. Əcnəbi tələbələr Ukrayna ilə müxtəlif ölkələrin sərhədlərində ilişib qalmışdılar. Çünki milyonlarla ukraynalı da canlarını qurtarmaq məqsədilə sərhəddə toplaşır. Ona görə də xarici ölkələrin tələbələri hamı kimi kilometrlərlə uzanan növbələrə dayanmaq məcburiyyətində idilər.

Kreml Dehliyə kömək etməyə hazır idi. Hindistan Ukrayna ilə bağlı BMT Təhlükəsizlik Şurasındakı səsvermədə Rusiyanın əleyhinə səs vermədi. Dehli bununla Kremllə münasibətləri gərginləşdirmək istəmədi. Məsələ burasındadır ki, Kəşmir məsələsində də Rusiya hər zaman BMT-də Hindistanın lehinə səs verib.

ABŞ-ın məşhur “Financial Times” nəşrinin yazdığına görə, Hindistan Ukrayna məsələsində Çinlə eyni mövqedən çıxış etməklə Rusiyanı özündən uzaqlaşdırmaq istəməyib. Dehlin Kremlin Çinlə Hindistan arasında balansı pozmamasını arzulayır”.

Bununla belə, məqalədə vurğulanıb ki, Ukraynanın işğalı və müharibənin davam etməsi Pekin kimi Dehlini də narahat edir:

“Ərazi bütövlüyü məsələsi Çin kimi Hindistan üçün də həssas mövzudur. Dehli bir başqa məkanda hər hansı dövlətin ərazi bütövlüyünün parçalanmasında maraqlı deyil. Digər tərəfdən, Dehli Kremlin Ukrayna məsələsində qıcıqlandırmaq istəməsə də, siyasi və hərbi əməkdaşlıq məsələlərində ABŞ-a, o cümlədən qonşuları Avstraliya və Yaponiyaya üstünlük verir. Dehli Qərbin Rusiyaya qarşı tətbiq etdiyi sanksiyalarla hesablaşmağa başlayıb. Hindistanın böyük şirkətləri və bankları obyektiv səbəblərdən rusiyalı həmkarlarıyla əməkdaşlıqdan çəkinirlər”.