Putin qonşu ölkələri hədəf kimi göstərdi – Təhlükəli konsepsiya

“Rusiya Prezidenti Vladimir Putin humanitar siyasət konsepsiyasını təsdiq edib. Konsepsiyaya əsasən, xarici ölkələrdə Rusiyanın mədəniyyəti, tarixi və dilinin təbliği dövlət siyasətinin tərkib hissəsinə çevriləcək. Bu fəaliyyət Kremlin birbaşa nəzarətində olacaq. Kremldən açıqlayıblar ki, konsepsiya indiki sərt sanksiyalar fonunda Qərb ölkələrində həyata keçirilməyəcək. Deməli, diqqət daha çox qonşu ölkələrə yönələcək”.

Teleqraf.com xəbər verir ki, bunu politoloq Elxan Şahinoğlu deyib.

Ekspert bildirib ki, konsepsiyanın əsas məqsədi kimi, “Xaricdə Rusiyanın obyektiv qavrayışını formalaşdırmaq” göstərilib:

Maraqlıdır, Rusiyanın Ukraynaya qarşı apardığı işğalçı müharibə və ətrafdakı separatçılara verdiyi dəstək fonunda hansı “obyektiv qavrayış”dan danışmaq olar? Demək, təbliğat obyektiv olmayacaq, Ukrayna mövzusunda ya danışmaq istəməyəcəklər, ya da deyəcəklər ki, Rusiya Ukraynada “rus dünyası”nı qorumağa çalışır.

Putinin təsdiq etdiyi konsepsiyada ayrı bənd kimi, xarici ölkələrdə rus dilinin mövqelərinin möhkəmləndirilməsinin vacibliyi göstərilib. Azərbaycan kimi ölkələrdə buna ehtiyac yoxdur. Rus dilinin məmləkətimizdə mövqeləri o qədər möhkəmdir ki, bir sıra ailələrdə ana dilini əvəz edib”.

Elxan Şahinoğlu bildirib ki, konsepsiyaya əsasən, xarici ölkələrdə rus dilində olimpiadaların keçirilməsi, rus ədəbiyyatının və tarixinin öyrənilməsinin gücləndirilməsi yer alıb:

“Bu o deməkdir ki, Rusiyanın müxtəlif ölkələrdəki səfirlikləri yeni konsepiyanın yerinə yetirilməsi üçün çalışmalarını gücləndirəcəklər.

Konsepsiyada İkinci Dünya Müharibəsinə aid belə bir bənd var: “Rusiya xarici ölkələrdə İkinci Dünya və Böyük Vətən Müharibəsinin qələbə qazanmasında sovet xalqının rolunu azaltmağa çalışma səylərinin qarşısını almalıdır”.

Bu bənd birbaşa Rusiyanın başqa dövlətlərin daxili işlərinə qarışmasıdır. Mən Stalini Hitlerlə bir tuturam, hər ikisi xalqları əzən diktator olub. İkinci Dünya Müharibəsi zamanı Varşavada alman faşistlərinə qarşışı qiyam qalxdı, polşalılar kömək gözlədilər, ancaq çayın o biri sahilində qətliamı izləyən SSRİ qoşunları gözləmə mövqeyində dayandılar. Belə çıxır ki, Rusiyanın humanitar siyasət konsepsiyasına görə öz ölkəmdə mənim kimi düşünənləri hədəfə alacaqlar.

Konsepsiyada separatçıları da unutmayıblar: “Rusiya Müstəqil Dövlətlər Birliyinə üzv ölkələrlə yanaşı Abxaziya, Cənubi Osetiya, Donetsk və Luqansk respublikaları ilə də ikitərəfli əlaqələrin genişləndirməlidir”.

Göründüyü kimi, bu, Rusiyanı dünyada tanıtmaq üçün xoşniyyətli konsepsiya deyil. Əsas məqsədi Kremlin planlarını və düşüncə tərzini konsepsiya yolu ilə müxtəlif dövlətlərə zorla qəbul etdirməkdir”.