7 Dekabr 2022 11:46
479
12 Punto 14 Punto 16 Punto 18 Punto

Qırğızıstan və Tacikistanın sərhədin ümumi hissəsinin daha 17 km-nin müəyyən edilməsi ilə bağlı ilkin razılığa gəlib.

Teleqraf.com xəbər verir ki, bu barədə Qırğızıstan Nazirlər Kabinetinin mətbuat xidməti məlumat yayıb.

Batken şəhərində Qırğızıstan-Tacikistan dövlət sərhədinin delimitasiyası və demarkasiyası üzrə iki ölkənin nümayəndə heyətlərinin topoqrafik işçi qruplarının növbəti iclası keçirilib. Görüş zamanı tərəflər ümumi uzunluğu 17.66 km olan Qırğızıstan-Tacikistan dövlət sərhəd xəttinin keçidinin təsviri layihəsini tamamlayıb və işlərin davam etdirilməsi məqsədilə 2023-cü il üçün görüşlərin qrafiki razılaşdırılıb.

İki ölkənin nümayəndə heyətlərinin növbəti görüşü Tacikistanda keçiriləcək.

Qırğızıstanla Tacikistan arasında dövlət sərhədinin uzunluğu təqribən 980 km-dir. Sərhədin delimitasiyası üzrə danışıqlar 2002-ci ilin dekabrından davam edir. Hazırda sərhəd xəttinin təxminən 600 km-i müəyyən edilib və dövlətlər tərəfindən qarşılıqlı tanınıb, qalan hissələr mübahisəli hesab olunur. Bu, tərəflər arasında zaman-zaman hərbi toqquşmalara yol açır. Ümumilikdə, 2014-cü ildən bəri Qırğızıstan-Tacikistan sərhədində 10-dan çox ciddi silahlı toqquşma baş verib.


Müəllif: Mənsur Rəğbətoğlu