Dəməşqə gözlənilməz səfər - “Suriyasız qala bilmərik” deyib gəldilər

Ərəb ölkələrinin parlamentarilərindən ibarət nümayəndə heyəti Dəməşqdə Suriya Prezidenti Bəşər Əsəd və bu ölkədən olan həmkarları ilə görüşüb.

Teleqraf.com xəbər verir ki, İraq, İordaniya, Fələstin, Liviya, Misir, Oman, Livan və Birləşmiş Ərəb Əmirliklərindən olan nümayəndələr Ərəb Parlament Birliyinin nümayəndə heyətinin tərkibində Suriyaya səfər ediblər.

Danışıqlar Suriyadakı münaqişə səbəbindən bu ölkənin ərəb dünyasında on ildən çox təcrid olunmasından sonra buzların əriməsinin əlaməti kimi qiymətləndirilir.

İraq parlamentinin spikeri Məhəmməd Xalbusi səfərlə bağlı belə deyib:

“Biz Suriyasız qala bilmərik, Suriya da geri dönəcəyini ümid etdiyimiz ərəb dünyası olmadan qala bilməz”.

Bəşər Əsəd rejimi 2011-ci ildə ona qarşı etirazları ölümcül şəkildə yatırdıqdan sonra Suriya ərəb dünyasında böyük ölçüdə təcrid olunub. Ərəb Liqası həmin il Suriyanın üzvlüyünü dayandırıb və bir çox ərəb ölkələri öz səfirlərini Dəməşqdən geri çağırıblar.

Əsəd rejimi BMT və Suriya hökumətinin məlumatına görə, fevralın 6-da ölkəsində baş verən və 6000-ə yaxın insanın ölümünə səbəb olan dağıdıcı zəlzələdən sonra ərəb ölkələrindən dəstək alıb. Yardım edənlər arasında Səudiyyə Ərəbistanı və BƏƏ də var.

Misir Prezidenti Əbdülfəttah əs-Sisi fevralın 7-də Əsədlə ilk dəfə telefonla danışıb, İordaniya xarici işlər naziri isə fevralın 15-də Dəməşqə ilk səfərini edib. Əsəd baş verən zəlzələdən sonra fevralın 20-də Omana xaricə ilk səfərini həyata keçirib.

Müharibə zamanı Suriyanı nadir hallarda tərk edən Əsədin 2022-ci ildə BƏƏ-yə səfəri onun vətəndaş müharibəsi başlayandan bəri ərəb ölkəsinə ilk səfəri olub. Müttəfiqləri İran və Rusiya bu mənada istisnadır, o, bir neçə dəfə bu ölkələrə səfər edib.