Ukrayna ərazilərini işğaldan azad edir – Dörd istiqamətdə irəliləyirlər

Ukrayna Silahlı Qüvvələri cəbhənin ən azı dörd bölgəsində əks-hücum əməliyyatları keçirib və irəliləyib.

Teleqraf.com xəbər verir ki, bu barədə ABŞ-ın Müharibə Araşdırmaları İnstitutunun (ISW) son hesabatında deyilir.

Məlumata görə, Ukrayna ordusu Limanda əks-hücum əməliyyatları keçirib. Həmçinin Ukrayna qüvvələri Baxmutda, Donetsk və Zaporoje vilayətlərinin kəsişməsində və Zaporojenin qərbində əks-hücumlarını davam etdirir.

Silahlı Qüvvələr Ukraynanın şərqində 9 kv.km ərazini geri alıb. Geolokasiya görüntüləri Ukrayna qoşunlarının Baxmutun şimal-qərbinə doğru irəlilədiyini göstərir. Həmçinin məlumata görə, Ukrayna Zaporoje vilayətinin qərb hissəsində Orexovodan cənubda uğur qazanıb.

Bundan əlavə, Rusiya və Ukrayna Baxmutda döyüşləri davam etdirir. Ukraynalılar Baxmutun şimal-qərbinə, xüsusən də Kurdyumivka və Klişçivka arasında hücuma keçib. Geolokasiya görüntüləri Ukrayna qüvvələrinin Klişçivkanın qərbindəki meşə ərazisinə doğru irəlilədiyini göstərir.

Svyatovo-Kreminna xəttində və Kreminnanın cənubunda da döyüşlər gedir.