Kremldən "Taxıl Dəhlizi" açıqlaması: "Davam etmək risklidir"

Rusiyanın təhlükəsizlik zəmanəti olmadan axıl dəhlizi sazişinə davam etmək risklidir.

Teleqraf.com xəbər verir ki, bunu Rusiya prezidentinin mətbuat katibi Dmitri Peskov deyib.

Peskov Rusiyanın təhlükəsizlik zəmanəti olmadan daşımaların davam etdirilməsinin müəyyən risklər yaradacağını söyləyib: "Rusiya olmadan nə isə rəsmiləşdirilsə, bu risklər nəzərə alınmalıdır. Bu baxımdan sözügedən riskləri hansı ölkənin və nə dərəcədə öhdəsinə götürməyə hazır olduğunu deyə bilmərik", - Peskov bildirib.

Xatırladaq ki, Qara dəniz taxıl dəhlizi sazişi 2022-ci ilin iyul ayında Türkiyə, Rusiya, Ukrayna və Birləşmiş Millətlər Təşkilatı arasında Ankarada imzalanıb. Sonuncu dəfə mayın 17-də İstanbulda Türkiyə hakimiyyətinin vasitəçiliyi ilə 60 gün müddətinə uzadılan “Taxıl sazişi”nə iyulun 17-də Rusiya tərəfindən xitam verilib.

Bunun ardınca Ukrayna Prezidenti Volodimir Zelenski "Razılaşma Rusiyasız davam edə bilər və davam etməlidir. Türkiyə Prezidenti Rəcəb Tayyib Ərdoğana və Birləşmiş Millətlər Təşkilatının (BMT) baş katibi Antonio Quterreşə taxıl sazişinin davam etdirilməsi və ya sazişin üçtərəfli formatda fəaliyyəti ilə bağlı təkliflərdən ibarət məktublar göndərdim. Ukrayna, BMT və Türkiyə birgə qida dəhlizinin fəaliyyətini və gəmilərin yoxlanılmasını təmin edə bilər", - deyə bildirmişdi.