İtirilmiş mövqelər uğurunda döyüş - Ruslar hücuma keçdilər

Ötən gün ərzində Rusiya qoşunları Kupyan istiqamətində hücuma keçərək, Donetsk və Zaporoje vilayətlərində itirilmiş mövqelərini geri almağa uğursuz cəhd göstəriblər.

Teleqraf.com xəbər verir ki, Ukrayna Silahlı Qüvvələrinin Baş Qərargahı ötən gün ərzində cəbhənin müxtəlif istiqamətlərində 33 toqquşma barədə məlumat verib.

Rusiya ordusu Kupyan istiqamətində Andriyevkanın cənub-şərqində yerləşən ərazilərdə irəliləməyə cəhd etsə də, bu səyləri nəticəsiz qalıb.

Bundan əlavə, Ukrayna müdafiə qüvvələri Avdiv və Marində irəliləmək istəyən Rusiya qoşunlarını dayandırıb.

Ruslar Andriyevka və Klişçivka rayonlarında, Staromayorsk və Rabotnıda itirilmiş mövqelərini bərpa etməyə uğursuz cəhd göstəriblər.

Eyni zamanda, Ukrayna ordusu Melitopol və Berdyanda irəliləməyə davam edir. Ukrayna qoşunları bu istiqamətlərdə azad etdikləri mövqelərdə möhkəmlənir və kəşfiyyat işləri aparır.