Bölgədə hərarət qalxır – İranın mövqeləri bombardman edildi

ABŞ-ın döyüş təyyarələri Suriyanın Deyr əz-Zor əyalətində İranın dəstəklədiyi terrorçu qruplaşmalara hava zərbələri endirib.

Teleqraf.com xəbər verir ki, bu barədə Suriya mənbələri məlumat yayıb.

Məlumata görə, İranın dəstəklədiyi qruplaşmalar Deyr əz-Zorun şərqində Əlbukamaldan Fərat çayına qədər uzanan Cisr Hasəbi kimi tanınan körpünün ətrafında toplaşıblar. ABŞ-ın döyüş təyyarələri bu istiqamətdə yerləşdirilmiş hərbi texnikaları hədəfə alıb.

Zərbələr nəticəsində ölən və yaralananların olduğu, texnikalardakı sursatların partladığı bildirilib.

İran qüvvələri və onların dəstəklədiyi qruplaşmalar Deyr əz-Zorun Əlbukamal, Mühsan və Əl-Məyadin yaşayış məntəqələrində yerləşir. Vilayətin mərkəzi və qərb əraziləri 2017-ci ilin noyabrında İranın dəstəklədiyi qruplaşmalar və Bəşər Əsəd rejiminin nəzarətinə keçib.