Əfqanıstanda məhkəmə binasına hücum

Əfqanıstanın Loqar əyalətində “Taliban” hərəkatının döyüşçülərinin məhkəmə binasına hücumu nəticəsində yeddi nəfər həlak olub, 23 insan yaralanıb.

“Tolo News” telekanalının yaydığı məlumata görə, ölənlər arasında hücumdan bir neçə saat əvvəl təyin edilmiş Apellyasiya Məhkəməsinin sədri də var. Məlumatda bildirilir ki, üç talibançı məhkəmə binasına daxil olaraq təhlükəsizlik xidmətinin əməkdaşlarına atəş açıb. Təxminən iki saat davam edən atışma nəticəsində hücumçular məhv edilib.

“Associated Press” yazır ki, bir ay əvvəl Əfqanıstan hökuməti tərəfindən “Taliban”ın altı döyüşçüsünün cəzalandırılmasından sonra hərəkat üzvlərinin məhkəmə binalarına hücumları tez-tez baş verir.