Paşinyandan qərar: "Bu binalar söküləcək"

“Bundan sonra hər hansı binanın tikintisi zamanı icazə və layihə olmalıdır”.

Teleqraf.com erməni mediasına istinadən xəbər verir ki, bunu Ermənistanın Baş naziri Nikol Paşinyan yanvarın 5-də hökumətin iclasında deyib.

Paşinyan əlavə edib ki, icazəsiz tikililərin uçotunun aparılması və onların gələcək taleyi ilə bağlı qərarın verilməsi üçün vaxt çərçivəsi müəyyən olunub:

“Burada əsas sualımız budur: riskləri necə idarə edəcəyik ki, bu müddət ərzində dalana dirənməsin?”.

Kadastr komitəsinin rəhbəri Suren Tovmasyan qeyd edib ki, 2021-ci ildə aparılan aerofotoqrafiya nəticəsində 2021-ci ilə qədər tikilmiş icazəsiz tikililər qeydə alınıb.

Nikol Paşinyan isə bəyan edib ki, təminatlar yaradılır ki, kimsə 2022-ci ildə tikilmiş icazəsiz tikililəri qanuniləşdirməyə cəhd etməsin: “Çünki bu baş verməyəcək və icazəsiz tikili sökülməyə məruz qalacaq”.

Erməni müxalifəti və müxalif mediası Paşinyanın bu addımını “baş nazirin tikintiyə müharibə elan etməsi” kimi təqdim edib.