Millət vəkilindən kazinolarla bağlı TƏKLİF

“İqtisadi islahatlar çərçivəsində maliyyə bazarlarına nəzarət palatasının yaradılmasını və bu quruma Rüfət Aslanlının rəhbərlik etməsini çox uğurlu addım sayıram”.

Teleqraf.com xəbər verir ki, bunu Milli Məclisin bu gün keçirilən plenar iclasında çıxışı zamanı Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev bildirib.

Deputat deyib ki, Rüfət Aslanı çox bacarıqlı kadrdır və Prezident tərəfindən ona böyük etimad göstərilib: “Əgər Rüfət Aslanlı bu sahədə müsbət dəyişikliyə nail olacaqsa, bu, maliyyə və bank sahəsində dirçəlişə səbəb olacaq. Rüfət müəllim mediaya, ictimaiyyətə açıq olmalıdır ki, gördüyü işlər də müsbət effektini versin.

Hökumət nə qədər uğurlu qərar qəbul edirsə-etsin, xalq və iş adamları buna inanmayacaqsa, bu, istənilən nəticəni verməyəcək. İnsanları və iş adamlarını inandırmaq lazımdır”.

Q.Həsənquliyev bu gün Milli Məclisdə müzakirə olunan idman mərc oyunları ilə bağlı məsələyə də toxunub: “Vaxtilə prezident Heydər Əliyev tərəfindən Azərbaycanda kazinolar ləğv ediləndə mən bunu dəstəkləmişdim. Ancaq indi vəziyyət dəyişib. Bu gün qonşu Gürcüstanın Batumi bölgəsində kazonolar fəaliyyət göstərir və həmin kazinolar ölkə büdcəsinə gəlir gətirir. Kazinolar ölkə vətəndaşları üçün qadağan edilsə də, turistlər üçün açıqdır. Qardaş Türkiyədə də bu təcrübə var və ölkə xeyli gəlir götürür. Düşünürəm ki, Azərbaycanın da ayrı-ayrı turizm bölgələrində bunu həyata keçirmək olar. Yəni, Azərbaycan vətəndaşları üçün kazinolar qadağan, əcnəbilər üçün isə açıq olarsa, bundan ölkə büdcəsi də xeyli qazanc əldə edə bilər”.

Nemət