26 Oktyabr 2023 13:49
1 652
12 Punto 14 Punto 16 Punto 18 Punto

“Muğan Bank”dakı qorunan əmanətlərə passiv vəsait kimi faiz hesablanmır, amma kreditlər üzrə aylıq faizlər əlavə olunur.

Teleqraf.com xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov deyib.

Deputat qeyd edib ki, “Muğan Bank”ın müflis elan edilməsi daha bir vacib məsələni gündəmə gətirib: “Bankda depoziti olanların əmanətləri üzrə faizlər sığorta hadisəsinin baş verdiyi günə qədər hesablanmış məbləğdə ödənilir. Sığorta hadisəsi isə bankın məcburi ləğv edilməsi və ya müflis elan olunması barədə məhkəmə qərarının qüvvəyə minməsidir. Yəni, “Muğan Bank”dakı qorunan əmanətlərə artıq faiz hesablanmır və həmin məbləğlər dəyişməz qalıb. Əmanətlərin ödənilməsinin 90 və bəzi hallarda 180 gün tələb etdiyini nəzərə alsaq, o halda bu müddətdə əmanətlər passiv vəsait kimi hesabda qalacaq.

Məsələn, vətəndaşın bankda 30 min manat əmanəti olub və bank müflis olanadək onun depozitinə 2700 manat faiz hesablanıb. Bununla da cəmi əmanət məbləği 32 min 700 manat olub. Əgər bank müflis olmasaydı, onun depoziti ilin sonunda 33 min 600 manat olmalı idi. Amma bank müflis olduğundan onun depoziti 3 ay sonra ödənilsə də, vətəndaşımız 33 600 manat deyil, 32 700 manat alır. Praktik olaraq vətəndaşın depoziti ondan asılı olmayan səbəbdən hesabda passiv formada saxlanılır. Əksinə, vətəndaşın müflis olanda bankda krediti varsa, həmin kreditə faiz hesablanması davam edir. Yəni, eyni vətəndaşın “Muğan Bank”da həm depoziti, həm də krediti varsa, o halda onun depozitinə faiz gəliri hesablanması dayandırılır, kreditinə isə aylıq faizlər əlavə olunur. Nəticədə depozit üzrə tam gəlir əldə edə bilməyən vətəndaş kredit üzrə öhdəliyini tam ödəməli olur”.

İqtisadçı təklif edir ki, əmanətlərə faizlər sığorta hadisəsi baş verən günə deyil, vəsaitin ödənilməsi barədə qərar verilən tarixədək hesablansın: “Bu halda 12 faizlə bankda 30 min manat əmanəti olan vətəndaşın depozitinə 3 ayda orta hesabla 900 manat faiz gəliri hesablanıb əlavə olunacaq. Bu halda vətəndaşın sığortalanmış depoziti ödənilən zaman ona 32700 manat deyil, müqavilədə göstərilən kimi 33600 manat veriləcək. Nəticədə bankın müflis olması vətəndaşımızın əmanət gəlirlərini azaltmayacaq”.


Müəllif: Yeganə Oqtayqızı