Vətən müharibəsi qazisi deputat köməkçisi təyin edildi - Foto

Bu gün 47 saylı Mingəçevir seçki dairəsi üzrə deputat köməkçisi vəzifəsinə təyinat oldu. Mənim təklifimlə bu vəzifəyə Mingəçevir sakini Məmmədov Pərviz Həzi oğlu təyin edildi.

Teleqraf.com xəbər verir ki, bu barədə Milli Məclisin 47 saylı Mingəçevir seçki dairəsi üzrə deputatı Aydın Mirzəzadə sosial şəbəkədəki hesabında bildirib.

O qeyd edib ki, bununla bağlı Milli Məclisin Aparatı üzrə əmr imzalanıb.

Aydın Mirzəzadə qeyd edib ki, Pərviz Məmmədov 1980-ci ildə anadan olub, peşəkar hərbçidir. Azərbaycan Ali Hərbi Məktəbini bitirib. 20 ildən çox ordu sıralarında xidmət edib. Vətən müharibəsində tabor komandirinin müavini kimi iştirak edib. Xocavənd döyüşlərində ağır yaralanıb, sağ qolundan ciddi zədə alıb. Hal-hazırda ehtiyatdadır. “Şücaətə görə”, “Xocavəndin azad edilməsinə görə” və daha səkkiz medalla təltif edilib.