“30 yaşa qədər 1 nəfər də elmlər doktoru yoxdur” – Alimlər orduya çağırılmalıdırmı?

Azərbaycanda və xarici ölkələrdə təhsil alan, Azərbaycan vətəndaşı olan bütün bakalavr, magistr və doktorantlara hərbi xidmətdən möhlət hüququ veriləcək.

Bu məsələ Milli Məclisin növbədənkənar plenar iclasında qəbul olunan “Hərbi vəzifə və hərbi xidmət haqqında” Qanuna edilən dəyişikliklərdə əksini tapıb.

Azərbaycan Milli Elmlər Akademiyasının Tarix üzrə fəlsəfə doktoru Kamran Əsədovun sözlərinə görə, magistr və doktorantlara möhlət hüququnun verilməsi çox mühüm bir addımdır: “Son illər ərzində bu pillədə təhsil alanların statistik göstəricilərinə nəzər salsaq görərik ki, böyük faizi xanımlar təşkil edir. Bu da bərabərlik prinsiplərinə uyğun deyil. Bundan başqa elmi dərəcəsi olan gənclərin sayı dünya təcrübəsindən olduqca aşağıdır”.

“Elm haqqında” Qanun layihəsi müzakirə olunanda bir çoxlarının magistr və doktorantlara möhlət hüququnun verilməsinə qarşı olduqlarını deyən fəlsəfə doktoru bildirib ki, onlar hesab edirdilər ki, Azərbaycan müharibə şəraitində yaşayır və hər kəs orduda mütləq iştirak etməlidir: “Amma onlar unudurdular ki, müharibə və mübarizə təkcə cəbhə xəttində aparılmır, həm də elm aləmində aparılır. Yəni ola bilər ki, qəhrəman Azərbaycan əsgəri erməni əsgərini məhv etsin, amma bununla iş bitmir.

Bizim elm adamları dünyaya bəyan etməlidir ki, Qarabağ Azərbaycanın ayrılmaz hissəsidir. İrəvan xanlığı və oralar azərbaycanlılara məxsus olub. Bundan əlavə, Azərbaycan gənci elmi tədqiqat işləri, kəşfləri ilə xalqa, dövlətə, millətə daha çox faydalı olacaq. Onsuz da magistr və doktoranturada təhsil alan oğlanların sayı o qədər də çox deyil ”.

Kamran Əsədov əlavə edib ki, il ərzində Azərbaycan ordusuna 700-800 oğlanın cəlb edilməməsi qəhrəman Azərbaycan ordusu üçün böyük say deyil: “Hazırda Azərbaycanın 150 mindən çox yüksək səviyyədə əsgər və zabit heyəti var. Amma elmdə gənclərin sayı azdır. Təsəvvür edin ki, bu gün 30 yaşa qədər 1 nəfər də elmlər doktoru yoxdur. Halbuki, dünyada bu yaşda kifayət qədər elmlər doktoru var. Hesab edirəm ki, bu qərar elm və təhsildə kadr hazırlığına böyük zəmin yaradacaq, təhsildə fasiləsizliyi təmin edəcək. Tədqiqatçıların böyük əksəriyyəti qadınlardır. Yeni qərar magistr və doktorantlar arasında oğlanların sayının artmasına da təsir edəcək”.

Qanundan sui - istifadə hallarına gəlincə, ekspert bildirib ki, bu, onsuz da həmişə olub, yenə də olacaq: “Yəni əlində bu və ya digər imkanları olan şəxslər onsuz da hərbi xidmətdən yayınıb. Əsas odur ki, bu qanun layihəsi inkişafa doğru addım olacaq. Son illər ərzində istər Azərbaycan Prezidenti, istərsə də Təhsil Nazirliyi tərəfindən təhsilin inkişafı üçün çox böyük addımlar atılır. Doğrudur, bəzən böyük narahatlıq doğurur, amma bu addımlar gələcəyə ünvanlamış addımlardır. Hesab edirəm ki, elmin inkişafı üçün atılacaq növbəti uğurlu addım bu sahədə olan şəxslərin maliyyə vəziyyətini yaxşılaşdırmaq yolunda olacaq”.

İlhamə ƏBÜLFƏT