FHN-in komanda-qərargah təlimi keçirilib

Fövqəladə Hallar Nazirliyi (FHN) Şimal-qərb Regional Mərkəzi və nazirliyin regionda yerləşən digər qurumları, habelə aidiyyəti yerli icra hakimiyyəti orqanlarının qüvvələrinin iştirakı ilə oktyabr 12-13-də Qəbələ rayon ərazisində komanda-qərargah təlimi keçirilib.

FHN-dən Teleqraf.com-a verilən məlumata görə, komanda-qərargah təliminə fövqəladə hallar nazirinin müavini, general-leytenant Etibar Mirzəyev rəhbərlik edib.

Təlimin keçirilməsində əsas məqsəd komandir-rəis heyətinin fövqəladə hal nəticəsində yaranmış vəziyyətin operativ qiymətləndirilməsi, idarəetmə və fəaliyyətin təşkili sahəsində təcrübələrinin daha da artırılması, şəxsi heyətin peşəkar vərdişlərinin gücləndirilməsi, aidiyyəti yerli icra hakimiyyəti orqanları və FHN-in qurumları arasında qarşılıqlı fəaliyyətin təkmilləşdirilməsi olub.

FHN-in 640 nəfərlik şəxsi heyəti və 110 ədəd texnikasının cəlb olunduğu təlim taktiki cəhətdən mürəkkəb ərazidə və əlverişsiz hava şəraitində keçirilib, qarşıya qoyulan tapşırıqlar uğurla yerinə yetirilib.

Təlimi Avstriya Respublikası Federal Daxili İşlər Nazirliyinin yanğın üzrə ekspertləri və dağ alpinizmi üzrə mütəxəssisləri izləyib.

Təlimdən sonra nazir müavini Etibar Mirzəyev avstriyalı mütəxəssislərlə görüşüb, həmçinin komanda-qərargah təliminin yekunları ilə bağlı müşavirə keçirib.

İlhamə ƏBÜLFƏT