Metropolitendən Çovdarovun jeton iddialarına - Cavab

Ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov məhkəmə prosesində verdiyi ifadəsində Bakı metrosundakı yeyinti faktlarından danışıb. Onun sözlərinə görə, vaxtilə aparatlar elə qurulub ki, hər 4 jetondan biri qeydiyyatdan keçməyib və ödəniş mənimsənilib.

Məsələ ilə bağlı Teleqraf.com Bakı Metropoliteni QSC-nin məsul şəxsləri ilə əlaqə saxlayıb.

Mətbuat xidməti və ictimaiyyətlə əlaqələr şöbəsinin rəisi Nəsimi Paşayev jetonla ödəmə sisteminin çoxdan ləğv olunduğunu bildirib: “Artıq neçə ildir metrolarda kart sistemi tətbiq olunub. Sərnişinlərin metrodan jetonla istifadə etdiyi vaxtlar nə olub, necə olub - bu barədə məlumatım yoxdur.”

Bakı Metropoliteni QSC-nin hərəkət xidmətinin rəisi Etibar İsayev məsələdən xəbərsiz olduğunu qeyd edib.

Bakı Metropoliteni QSC-nin rabitə xidmətinin rəisi Elçin adlı şəxs isə məhkəmədə səslənmiş iddia ilə bağlı araşdırma aparıldığını deyərək daha sonra əlaqə saxlamağı məsləhət görüb.

Qeyd edək ki, 2006-cı ildən etibarən Bakı metropolitenlərində köhnə jeton ödəmə sisteminin əvəzinə yeni RFİD kartlar tətbiq edilməyə başlayıb. 2007-ci ildə tam olaraq kart sisteminə keçilib.

6 avqust 2015-ci ildən isə Bakı metropolitenində vahid kart sistemi işə düşüb.

30 sentyabr 2009-cu ildə Tarif Şurasının iclasında Bakı Metropolitenində gediş haqqının qaldırılması barədə məsələ müzakirə olunub. Oktyabrın 1-dən gediş haqqının 5 qəpikdən 15 qəpiyə qaldırılması barədə qərar qəbul olunub. 2011-ci il dekabrın 1-dən etibarən metroda gediş haqqı yenidən qalxaraq, 20 qəpik olub.

Xatırladaq ki, Tağı Əhmədov 1998-2014-cü illərdə Bakı Metropoliteninin rəisi vəzifəsində çalışıb.