Gömrükçülər spirtli içkilərin ölkəyə gətirilməsinin qarşısını aldılar

Gömrük nəzarətindən gizlədilən spirtli içkilərin ölkəyə gətirilməsi cəhdinin qarşısı alınıb.

Dövlət Gömrük Komitəsinin Mətbuat və İctimaiyyətlə Əlaqələr Şöbəsindən Teleqraf.com-a bildirilib ki, Qərb Ərazi Baş Gömrük İdarəsinin “Qırmızı Körpü” gömrük postunda Gürcüstandan ölkəmizə “Opel Vectra” markalı avtomobil ilə gələn Azərbaycan vətəndaşı Əməliyyat və Təhqiqat İdarəsinin məlumatı əsasında saxlanılıb və şifahi sorğu-sual edilib. Bu zaman o, idarə etdiyi nəqliyyat vasitəsində gömrük nəzarətindən gizlədilən və bəyan edilməyən hər hansı predmetin olmadığını bildirib. Lakin yoxlama zamanı avtomobilin arxa oturacağının altında və yük yerində hər biri 1 litr olmaqla, 8 ədəd üzərində “Nemirovskaya” yazılan və 22 ədəd üzərində “Nemoroff” yazılan spirtli içki aşkarlanıb.

Faktla bağlı araşdırma aparılır.