Çay sahilində yeyib-içənlər saxlanıldı - "Seyidlər bağı"nda məclis

Ölkə ərazisində xüsusi karantin rejiminin elan olunmasına baxmayaraq nizam-intizamın pozulması hallarına rast gəlinməkdədir.

Daxili İşlər Nazirliyinin mətbuat xidmətindən Teleqraf.com-a veriln məlumata görə, Zərdab rayonu Aşağı Seyidlər kəndində “Seyidlər bağı” adlanan ərazidə, Kür çayının sahilində bir qrup şəxs toplaşaraq yeyib-içmək məclisi təşkil edib, xüsusi karantin qaydalarını kobudcasına pozublar.

Daha sonra onlar təşkil etdikləri məclisin video görüntülərini çəkərək sosial şəbəkələrdə paylaşıblar.

Məlumat daxil olan kimi Zərdab Rayon polis Şöbəsinin əməkdaşları tərəfindən həmin məclisdə iştiirak edən və karantin qaydalarını pozan 19 nəfər saxlanılıb. Onlardan ikisi məclisin təşkilatçısı rayon sakinləri Rza Alxasov və Sabiq Nəbiyev rayon məhkəməsinin qərarı ilə 10 sutka inzibati qaydada həbs edilib.

Digərləri barəsində isə İnzibati Xətalar Məcəlləsinin 211-ci maddəsi ilə tədbir görülərək 100 manat miqdarında cərimə ediliblər.