FHN Akademiyasında konfrans keçirildi - Foto

Bu gün Fövqəladə Hallar Nazirliyinin (FHN) Akademiyasında ümummilli lider Heydər Əliyevin anadan olmasının 98-ci ildönümünə həsr olunmuş “Fövqəladə hallarla mübarizənin aktual problemləri” mövzusunda VI elmi-texniki konfrans keçirilib.

Teleqraf.om-un FHN-in saytına istinadən verdiyi xəbərə görə, videokonfrans rejimində keçirilən tədbirdə FHN Akademiyasının və respublikanın bir sıra ali məktəblərinin professor və müəllimləri iştirak edib.

Konfransı giriş sözü ilə açan Akademiyanın rəisi general-mayor Baba Salayev qeyd edib ki, ulu öndər Heydər Əliyev ölkənin inkişafında, milli intibahın təminatında təhsilə və elmə daim böyük əhəmiyyət verib. Gənc nəslin elm və təhsilə cəlb edilməsi onun müdrik siyasətinin daimi prioritetlərindən olub. Ümummilli liderin layiqli davamçısı Prezident İlham Əliyev də təhsil və elm sahəsini daim xüsusi diqqətdə saxlayır. Məhz ölkə başçısının bilavasitə təşəbbüsü ilə həyata keçirilən məqsədyönlü tədbirlər nəticəsində bu istiqamətdə əhəmiyyətli nəticələr əldə olunur.

Akademiya rəisi, həmçinin bildirib ki, dünyanın ayrı-ayrı hissələrində son zamanlar baş verən təbii və texnogen mənşəli fəlakətlər göstərir ki, bu hadisələrin elmi əsaslarının daha dərin, hərtərəfli, kompleks öyrənilməsinə və tədqiq edilməsinə böyük ehtiyac var. Konfransda təqdim edilən məqalələrin fövqəladə halların qarşının alınması və nəticələrinin aradan qaldırılması istiqamətdə görülən işlərə faydası olacaqdır.

Akademiya rəisinin müavini polkovnik İlham Babaşov ümummilli lider Heydər Əliyevin əhalinin və ərazilərin təhlükəsizliyinin təmin olunmasında əvəzsiz rolundan danışıb. Natiq Ulu Öndərin mülki müdafiə, insanların həyat və fəaliyyətinin təhlükəsizliyi məsələləri ilə əlaqədar misilsiz xidmətlərindən geniş bəhs edib.

Daha sonra Fövqəladə Hallar Nazirliyinin Regional mərkəzlərlə işin təşkili, layihələrin idarə edilməsi və təhsil məsələləri üzrə Baş idarəsinin Layihələrin idarə edilməsi və Təhsil məsələləri üzrə idarəsinin rəisi Azadi Quliyev qeyd edib ki, ümummilli lider Heydər Əliyev zəngin siyasi fəaliyyəti ilə Azərbaycanın dövlətçilik tarixində müstəsna rol oynayıb. Azərbaycan xalqı Ulu Öndərin adını hər zaman əziz tutur, müstəqil dövlətimizin xilaskarı, qurucusu və memarı kimi tanıyır.

Plenar iclasda FHN-in Fövqəladə halların xəbərdar edilməsi və daxili təhlükəsizlik Baş idarəsinin Fövqəladə halların xəbərdar edilməsi işinin təşkili idarəsinin əhalinin və ərazilərin təhlükəsizliyinin təşkili şöbəsinin müdiri texnika elmləri üzrə fəlsəfə doktoru Pərviz Mehdiyev, Akademiyanın Humanitar fənlər kafedrasının müdiri tarix üzrə fəlsəfə doktoru dosent Fizuli İbrahimzadə, Tədris şöbəsinin mühəndis-proqramçısı daxili xidmət baş leytenantı Şakir Fərəcullayev, Təbət və fundamental fənlər kafedrasının müəllimi Bağır İbadov, Həyat fəaliyyətinin təhlükəsizliyi ixtisas fənləri kafedrasının baş müəllimi baş leytenant Rəşad Məmmədli və Milli Aviasiya Akademiyasının Aviasiya təhlükəsizliyi kafedrasının baş müəllimi Nadir Xalıqov məruzələrlə çıxış ediblər.

Plenar iclasdan sonra konfrans öz işini bölmə iclaslarında davam etdirib. Bölmə iclaslarında FHN Akademiyasının və ölkənin bir sıra ali məktəblərinin nümayəndələri müxtəlif mövzular üzrə məruzələrlə çıxış ediblər.