"Komitə tərəfindən Aşura ilə bağlı tədbirlər hazırlanıb”

Dini Qurumlarla İş üzrə Dövlət Komitəsində müşavirə keçirilib

Bu gün Dini Qurumlarla İş üzrə Dövlət Komitəsində (DQİDK) Azərbaycan Respublikasının millətlərarası, multikulturalizm və dini məsələlər üzrə Dövlət müşaviri Kamal Abdullayevin iştirakı ilə ölkədəki mövcud dini duruma həsr olunmuş müşavirə keçirilib. Komitənin mətbuat xidmətindən Teleqraf.com-a verilən məlumata görə, DQİDK sədri Mübariz Qurbanlı gündəlikdəki məsələlər barədə ətraflı məlumat verərək bildirib ki, Dövlət Komitəsi qarşıdan gələn Aşura mərasimləri ilə bağlı müəyyən tədbirlər hazırlayıb və artıq həmin tədbirlərin icrasına başlanılıb. O qeyd edib ki, Dövlət Komitəsi 16 noyabr Beynəlxalq Tolerantlıq Gününə həsr olunmuş tədbirlər təşkil etməyi nəzərdə tutur. Həmin tədbirlər Bakı ilə yanaşı, Gəncə və Qəbələ şəhərlərində də təşkil olunacaq.

Dövlət müşaviri K.Abdullayev bölgələrə səfərləri zamanı dindarlar və ziyalılarla görüşlərdə qaldırılmış məsələlər və verilmiş tapşırıqların icra vəziyyəti ilə maraqlanıb. Dövlət müşaviri səsləndirdiyi fikirlərində ölkəmizdə mövcud olan dinlərə dövlətin münasibətinin dərin tarixi ənənələrə söykəndiyini, ölkə prezidenti tərəfindən bu ənənələrin daima qorunub saxlanıldığını diqqətə çatdırıb, görülmüş işlər, planlaşdırılan tədbirlər və qarşıda duran vəzifələrdən danışıb, həmçinin, müvafiq tövsiyələrini verib.

Müşavirədə ölkədəki mövcud dini durum, dövlət-din münasibətləri, Azərbaycanın zəngin tolerantlıq ənənələri, milli-mənəvi dəyərlərimizin qorunması və digər aktual məsələlərlə bağlı fikir mübadiləsi aparılıb. Qeyd olunub ki, Aşura günü təziyə mərasimlərində Kərbəla şəhidləri ilə yanaşı, Qarabağ müharibəsi zamanı şəhid olan soydaşlarımız və qazilərimiz də anılmalıdır.

Mövcud dini durum və komitəsinin fəaliyyəti ilə bağlı digər məsələlər müzakirə edildikdən sonra M.Qurbanlı bu formatda tədbirlərin mütəmadi keçirilməsini səmərəli hesab edərək, gələcəkdə də davam etdirilməsinin zəruriliyini vurğulayıb.

BƏXTİYAR