Fulya Öztürk Məhərrəmlə Siracdan danışdı - "Hər dəfə bizə..."

Türkiyənin məşhur jurnalisti, 44 günlük Vətən müharibəsində cəbhə bölgəsində baş verənləri dünya ictimaiyyətinin diqqətinə çatdıran Fulya Öztürk bu gün Kəlbəcərdə minaya düşərək həlak olan jurnalistlərlə bağlı danışıb.

Teleqraf.com xəbər verir ki, F. Öztürk REALTV-yə açıqlamasında Ermənistanın növbəti dəfə qətliam törətdiyini vurğulayıb:

“Ermənistan 3 günahsız insanı bu həyatdan aldı. Biz 44 günlük müharibədə Ermənistanın etdiyi zülmlərdən, işgəncələrdən günlərlə danışdıq. Ancaq yenə də iki sevdiyim, birlikdə fəaliyyət göstərdiyimiz həmkarlarımızı da bu həyatdan qopartdılar.

Qarabağda çəkilişlər aparanda hərbçilər bizə tez-tez minalarla bağlı xəbərdarlıqlar edirdilər. İşğalçı, terror zehniyyətli Ermənistan dövləti hər tərəfi minalamışdı. Bir neçə dəfə biz də bu cür hadisələrlə qarşılaşmışdıq. Ona görə də diqqətli hərəkət edirdik. Mən də vəzifə başında ikən Türkiyədə belə bir kədərli xəbəri aldım. Məhərrəmlə Sirac birgə işlədiyimiz, hər dəfə bizə yardım edən iki qiymətli həmkarımız idi. Buna görə çox kədərliyəm. Onlar bizim jurnalist şəhidlərimiz, qəhrəmanlarımızdır. Vəzifə başındaykən şəhid oldular. Bunu hər kəs bilməlidir, çox kədərliyəm, başımız sağ olsun”.