Belarusdan toyuq əti idxalına qadağa qoyuldu

Qida Təhlükəsizliyi Agentliyi ölkəyə idxal olunan qida məhsullarına nəzarət tədbirlərini davam etdirir.

Agentliyin informasiya təminatı və innovativ həllər şöbəsindən Teleqraf.com-a verilən məlumata görə, idxalatçı şirkət “AFM Construction” MMC-nin Belarus Respublikasından idxal etdiyi “Ptisefabrika Qorodok”” MMC-nin istehsalı olan 7610,07 kiloqram dondurulmuş toyuq məhsulundan götürülmüş nümunələrin müayinələri nəticəsində salmonella aşkarlanıb.

Faktla bağlı qanunvericiliyə uyğun olaraq müvafiq tədbir görülüb. Həmçinin istehsalçının respublikamıza həmin məhsulun idxalına müvəqqəti qadağa qoyulub və ixracatçı ölkənin aidiyyəti qurumuna müvafiq bildiriş göndərilib.