Finalın şərhində səslə görüntü uzlaşmadı, İTV tənqid olundu - Video

Dünən AVRO-2024-ün final görüşünün yayımı zamanı İTV telekanalında yaranan texniki problem müzakirələrə səbəb olub.

Teleqraf.com xəbər verir ki, səs və görüntü uyğunsuzluğu sosial şəbəkələrdə ciddi tənqid olunub.

Şərhçi qarşılaşmanı birbaşa Almaniyadan şərh etdiyi üçün səs və görüntü arasında təxminən 3-5 saniyə fərq yaranıb.

Müzakirələr əsasən İspaniya millisinin üzvü Niko Uilyamsın qol vurduğu kadrın şərhdən bir neçə saniyə sonra yayımlanması ətrafında aparılıb. İlk dəfə Avropa Çempionatını meydandan şərh etsələr də, rejissorlar heç cür səs ilə görüntünü uyğunlaşdıra bilməyiblər.

Məsələ ilə bağlı İTV-nin idman departamentinin direktoru Kənan Hakimov sosial şəbəkə hesabında açıqlama yayıb: “Final oyununun şərhində səslə görüntünün üst-üstə düşməməsi ilə əlaqədar yaranan problemə görə bu məsələdə məsuliyyət payı olan şəxs olaraq öz adımdan üzr istəyirəm. Futbol azarkeşi kimi televiziya qarşısında hansı hisslər keçirdiyinizi yaxşı başa düşürəm və haqlı tənqidləriniz qarşısında deyiləcək bir söz yoxdur. Oyundan öncə test zamanı hər şey normal olsa da, təəssüf ki, şərhin gedişatında vəziyyəti düzəltmək üçün dəfələrlə cəhd edilsə də, yaranan problemi aradan qaldırmaq mümkün olmadı”.

Qeyd edim ki, UEFA bir müddət öncə yeni sistem üzərindən işləməyə başlayıb. Belə ki, şərhçinin səsi əvvəlki kimi peyk vasitəsilə deyil, internetlə göndərilir. Bu Avropa çempionatının gedişatında bir çox ölkələrin yayımçı telekanalları şərh zamanı eyni vəziyyətlə üzləşiblər və onlar da oyunun gedişatında mövcud problemi aradan qaldıra bilməyiblər”.