Putinin mat etdiyi jurnalist Bakıya gəlir – FOTO/VİDEO

ABŞ-da nüfuzlu və populyar siyasi şərhçisi, beynəlxalq münasibətlər üzrə ekspert, CNN telekanalının aparıcısı, həftəlik “Newsweek International” nəşrinin redaktoru Farid Zakariya bu ilin martında keçiriləcək V Qlobal Bakı Forumunda iştirak edəcək.

Diasporla İş üzrə Dövlət Komitəsindən Teleqraf.com-a verilən məlumata görə, bu barədə F.Zakariya ilə Nizami Gəncəvi Beynəlxalq Mərkəzinin nümayəndəsinin görüşündə bildirilib. Görüşdə həmçinin, NGBM-nin fəaliyyəti, V Qlobal Bakı Forumuna dair geniş müzakirə aparılıb, F.Zakariyanın tədbirdə iştirakının detalları dəqiqləşdirilib.

F.Zakariya eyni zamanda forum iştirakçılarına videomüraciət ünvanlayıb. Müraciətində Bakıya ilk dəfə səfər edəcəyini bildirən F.Zakariya eyni zamanda dünyada baş verən proseslərin gərgin bir vaxtında Bakı Forumunun əhəmiyyətini vurğulayıb.

Qeyd edək ki, Hindistanda dünyaya gələn müsəlman əsilli F.Zakariya ABŞ-da tanınmış politoloq və jurnalistdir. Beynəlxalq münasibətlərə dair bir neçə kitabın müəllifi, CNN telekanalında aparıcı olan F.Zakariya “New York Times”, “Wall Street Journal” kimi nüfuzli nəşrlərdə öz yazıları ilə çıxış edib, bir sıra qəzet və jurnallarda isə redaktorluq edib.

F.Zakariya 2016-cı ilin iyununda keçirilən ənənəvi illik Sankt-Peterburq Beynəlxalq İqtisadi Forumunun plenar iclası zamanı Rusiya Federasiyasının prezidenti Vladimir Putindən CNN üçün müsahibə götürmüşdü. Müsahibə zamanı aparıcının V.Putinin sərrast, tutarlı cavabları qarşısında özünü itirməsi uzun müddət müzakirə obyektinə çevrilmişdi.

Səxavət