UNO-larla bağlı Baydenə qəribə sual – Cavab gülüş doğurdu

ABŞ Prezidenti Co Bayden bir jurnalistin uçan naməlum obyektlərlə (UNO) bağlı sualını cavablandırarkən keçmiş Amerika lideri Barak Obamanı xatırlayıb.

Teleqraf.com xəbər verir ki, “Fox News”-un müxbiri Peter Dusi mətbuat konfransında Baydenə maraqlı bir sual ünvanlayıb.

“Obama göydəki naməlum cisimlərin, izaholunmaz atmosfer hadisələrinin şəkilləri və qeydlərinin olduğunu dedi, amma onların nə olduqlarını tam bilmədiyimizi bildirdi. Bu barədə siz nə düşünürsünüz?", - Dusi Amerika liderindən soruşub.

Bayden suala gülüb və mövqeyini açıqlamayıb: “Mən Obamadan bir daha soruşardım”.

Amerika liderinin cavabı zalda gülüşə səbəb olub.

Barak Obama mayın 19-da ABŞ hərbçilərinin UNO-ları müşahidə etdiyini təsdiqləyib. O, arxivlərdə mənşəyi izaholunmaz göy cisimlərinin fotoşəkillərinin olduğunu bildirib. Bununla yanaşı, Obamanın sözlərinə görə, ABŞ-da yadplanetlilər və yerdənkənar sivilizasiyaların mövcudluğuna dair dəlillərin saxlanıldığı arxiv yoxdur.