Rusiya Talibanla masaya oturdu: Razılıq əldə olundu

Rusiya 2003-cü ildən terrorçu təşkilat kimi tanıdığı Taliban hərəkatı ilə masaya oturub.

Teleqraf.com xəbər verir ki, Rusiya lideri Vladimir Putinin Əfqanıstan üzrə təmsilçisi Zamir Kabulov Taliban hərəkatının nümayəndələri ilə danışıqlar aparıb.

Danışıqlar zamanı Taliban Orta Asiya respublikalarına hücum etməyəcəyinə dair söz verib.

Rusiya Xarici İşlər Nazirliyi bəyan edib ki, görüş Moskvada baş tutub. Burada Taliban nümayəndələri Rusiyaya Orta Asiya respublikalarının sərhədlərini keçməyəcəyini bildiriblər.

Taliban eyni zamanda Əfqanıstanda olan xarici ölkə diplomatik təmsilçiliklərini toxunulmaz saydıqlarını və onların təhlükəsizliyini təmin edəcəklərini ifadə edib.

Qeyd edək ki, ABŞ və NATO qüvvələri Əfqanıstandan çıxdıqdan sonra Taliban hərəkatı ölkəyə nəzarəti ələ keçirir. Hazırda Taliban Rusiya, Pakistan, İran, Birləşmiş Ərəb Əmirliyi və Qətər kimi dövlətlərlə danışıqlar aparır.