“Bunu Lavrovdan alıb Çavuşoğluna çatdırdım” - Yerxov

“Rusiya Ukraynaya hücum etməyəcək. Türkiyə Ukraynanı Minsk razılaşması ilə bağlı öhdəliklərini yerinə yetirməyə razı sala bilsə, buna görə minnətdar olarıq”.

Teleqraf.com xəbər verir ki, Rusiyanın Türkiyədəki səfiri Aleksey Yerxov TRT Haberə müsahibəsində deyib.

Yerxov Ukraynanın işğalı üçün tarixlərin verildiyini, amma bunların heç birinin baş tutmadığını söyləyib:

“Bununla bağlı isteriya var. Vətəndaşlar təxliyə olunur, konsulluqlar bağlanır, başqa yerlərə köçürülür. Rusiyanın az qala qaçılmaz olaraq Ukraynanı işğal edəcəyini deyirlər və mümkün işğal tarixlərindən danışırlar. Bəs nə oldu, işğal baş verdimi? Eyni zamanda Ukraynaya müasir, o cümlədən hücum silahları göndərilir. Ukrayna ordusuna təlim keçmək üçün hərbi mütəxəssislər göndərirlər”.

Yerxov gərginliyi qəsdən artırmaqla Rusiyaya qarşı sanksiyalar tətbiq etmək niyyətində olduqlarını bildirib:

“Dünən hücum etmədik, bu gün də hücum etmədik, sabah da hücum etməyəcəyik”.

Yerxov kritik problemlər üçün təcili həll yollarına ehtiyac olduğunu deyib:

“Bizim üçün dialoq imkanları tükənməkdən uzaqdır və beynəlxalq əlaqələri davam etdirmək niyyətindəyik”.

Səfir Rusiya Xarici işlər naziri Sergey Lavrovun NATO ölkələrinə məktub göndərdiyini və bu məktubu Xarici işlər naziri Mövlud Çavuşoğluna özünün çatdırdığını bildirib.

“Türkiyə Ukrayna ilə imtiyazlı münasibətindən istifadə edərsə, Ukraynanı Minsk razılaşması üzrə öhdəliklərini yerinə yetirməyə razı sala bilərsə, buna görə minnətdar olarıq”, - Rusiya səfiri qeyd edib.