İranda rejim dəyişikliyi üçün qollar çırmalandı – Hərəkətə keçirlər

“İranda rejim dəyişikliyi ABŞ və müttəfiqlərinin marağındadır”.

Teleqraf.com xəbər verir ki, bunu politoloq Elxan Şahinoğlu deyib.

Ekspert İranda molla rejimi əleyhinə davam edən kütləvi nümayişlərə diqqət çəkib:

“Vaşinqtonun Tehranla nüvə anlaşmasına marağı azalıb, danışıqlar dondurulub. Bu, təbiidir. Çünki İran çalxalanır, Vaşinqton hazırkı vəziyyətdə gözləmə mövqeyinə keçərək, hadisələrin hansı istiqamətdə inkişafını müşahidə edəcək. Bundan ABŞ Prezidenti Co Baydenin “Biz İranı tezliklə azad edəcəyik” açıqlaması da xəbər verir. Ağ Ev sahibi Kaliforniyada çıxışı zamanı deyib ki, İranda hökumət əleyhinə olan nümayişçilər tezliklə azadlıq əldə edəcəklər.

ABŞ prezidenti “nümayişçilər tezliklə azadlıq əldə edəcəklər” dedikdə İranda rejim dəyişikliyini nəzərdə tutur. Bu asan başa gəlməyəcək. Rejim asanlıqla təslim olmayacaq, ancaq proses artıq başlayıb, cin şüşədən çıxıb.

Ağ Ev sahibi “biz İranı azad edəcəyik” dedikdə isə işin içində ABŞ və müttəfiqlərinin də olacağına işarə edir. Bircə Vaşinqton İranda 1950-ci illərin səhvini təkrarlamasın. ABŞ və Böyük Britaniya kəşfiyyatı 1953-cü ildə yerli əlaltıları vasitəsilə İranın o zamankı liberal görüşlü baş naziri Məhəmməd Müssədiqi devirərək şah rejiminin davamına üstünlük verməklə illər sonra dindarların fəallaşmasına və İslam inqilabına şərait yaratdılar”.