Hücuma keçən rus ordusu ağır itkilərlə dayandırıldı – Darmadağın edildi

Ukrayna müdafiə qüvvələri gün ərzində əsas cəbhə xəttində - Liman, Baxmut, Avdiv və Marində Rusiya ordusunun 49-dan çox hücumunun qarşısını alıb.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rusiya qoşunları əsas səylərini Baxmut və Marinə yönəldib.

Gün ərzində Liman istiqamətində quru əməliyyatları qeydə alınmasa da, hava zərbələri endirilib.

Baxmut şəhəri uğrunda şiddətli döyüşlər davam edir. Ruslar şəhərin mərkəzi ilə yanaşı, İvanovsk qəsəbəsi istiqamətində irəliləməyə cəhd göstərsələr də, bu səyləri nəticəsiz qalıb.

Ukrayna ordusu Avdiv və Marin yaxınlığında da Rusiya qoşunlarının çoxsaylı hücumlarını dəf edib. Avdiv aviasiya zərbələrinə məruz qalıb. Ruslar Marin istiqamətində Krasnoqoriv, Qostrom, Georgiv və Novomixaylivə hücum edib.

Bundan başqa, Ukrayna Hərbi Hava Qüvvələri Rusiyanın şəxsi heyəti və hərbi texnikasının cəmləşdiyi ərazilərə 9 zərbə endirib. Rusların 7 zenit-raket sistemi sıradan çıxarılıb. Müxtəlif tipli 6 hücum PUA-sı məhv edilib.

Ukraynanın raket qoşunları və artilleriya bölmələri 3 idarəetmə məntəqəsi, 5 canlı qüvvənin cəmləşmə zonası, atəş mövqelərində 4 artilleriya bölməsi, zenit-raket kompleksi, 5 elektron döyüş stansiyası, o cümlədən sursat anvbarına zərbələr endirib.