İran dronları ilə hücum – Gecə saatlarında hərəkətə keçdilər

Rusiya qüvvələri əsas səylərini dörd istiqamətdə cəmləşdirib. Hazırda bu istiqamətlərdə ağır döyüşlər gedir, rus ordusu bəzi yerlərdə irəliləməyə çalışır.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Ruslar əsas səylərini Liman, Baxmut, Avdiv və Marin şəhərlərinin işğalına yönəldib. Gün ərzində bu istiqamətlərdə 40 toqquşma baş verib.

Rusiya qoşunları Liman istiqamətində Kreminna-Yampolivkada hücum əməliyyatı keçirib. Bu yöndə 8 yaşayış məntəqəsi artilleriya atəşinə məruz qalıb.

Bundan əlavə, Rusiya Baxmutda Orixovo-Vasilivka istiqamətində uğursuz hücum əməliyyatı keçirib.

Ukrayna ordusu Avdivdə də rusların hücumlarının qarşısını alıb.

Marin şəhəri və Şaxtyor istiqamətində Novomixayliv hücuma məruz qalıb, amma Rusiyanın bu səyləri nəticəsiz qalıb.

Həmçinin qeyd edilir ki, gecə saatlarında Rusiya İranın “Şahid” PUA-ları ilə Ukraynaya növbəti zərbələr endirib. S-300 və “İskəndər-M” sistemlərindən də Ukrayna ərazisi atəşə tutulub.

Ukrayna aviasiyası 30 ədəd “Şahid” dronunu məhv edib.