Putin Lukaşenkoya Stavropol kartofundan danışacaq

Putin Lukaşenkoya "Belarus kartofundan daha yaxşı" olan Stavropol kartofu haqqında danışacağını bildirib.

Teleqraf.com TASS-a istinadən xəbər verir ki, Rusiya prezidenti Vladimir Putin Belarus prezidenti Aleksandr Lukaşenkoya Stavropol vilayətində becərilən kartoflar barədə danışacağına söz verib.

Putin Stavropolun rəhbəri Vladimir Vladimirovla görüşü zamanı qubernatorun regionun kənd təsərrüfatı ilə bağlı hesabatını dinləyib.

Vladimirov qeyd edib ki, rayonda əvvəllər kartof becərilməmişdir. Putinin tapşırığından sonra 600 min ton məhsul götürülüb.

Rusiya prezidenti “Kartof dadlıdırmı?” deyə qubernatordan soruşub. Stavropolun rəhbəri "gələn dəfə gələndə kartof gətirəcəm" deyə bildirib.

Putin isə öz növbəsində kartofun Belarusdakı kimi dadlı olub-olmamasını soruşub.

"Məncə, daha yaxşıdır" deyə Stavropol rəhbəri bildirib.

Putin isə "onda mən bu barədə Aleksandr Qriqoreviçə deyəcəm", deyə qeyd edib.